ՀԱՊԿ-ն արձանագրել էր, որ Ադրբեջանն իր համար նույնքան եղբայրական պետություն է, ինչքան Հայաստանը, այսօր «Համապարփակ անվտանգություն և դիմակայություն 2025» միջազգային համաժողովում հայտարարել է ՀՀ վարչապետ Նիկոլ Փաշինյանը:
Վերջինս նշել է, որ նախկինում պատկերացումն այն էր, որ «մեր խոցելիությունը նվազեցնելու առաջնային գործիքները ռազմաքաղաքական դաշինքներն են ու բանակը», բայց, ըստ նրա, պատմությունը եկավ ապացուցելու, որ այս բանաձևը չաշխատեց ո՛չ առաջին, ո՛չ էլ երկրորդ կետով։
«Առաջին մասով չաշխատեց երեք անգամ․ առաջինը՝ ՀԱՊԿ-ն արձանագրում էր, որ Ադրբեջանը իր համար նույնքան եղբայրական պետություն է, ինչքան Հայաստանի Հանրապետությունը, և որ ՀԱՊԿ-ը ճանաչում է Ադրբեջանի տարածքային ամբողջականությունը։ Մենք այս նախադասությանը երբեք չենք առերեսվել»,- նշել է Փաշինյանը:
Վարչապետի խոսքով՝ այն, որ «Ադրբեջանի տարածքային ամբողջականություն» ասելով դաշինքը միշտ նկատի է ունեցել նաև Լեռնային Ղարաբաղը, Ռուսաստանի նախագահ Վլադիմիր Պուտինը վերահաստատել է 2020-ի նոյեմբերի 18-ին և դեկտեմբերի 17-ին՝ ասելով, որ Ղարաբաղի տարածքը միջազգային իրավունքի տարածքի տեսանկյունից Ադրբեջանի մաս է և միշտ էլ համարվել է այդպիսին։
«Այսինքն՝ անվտանգության այս առաջնային կոնցեպտը՝ ռազմաքաղաքական դաշինքի, Ղարաբաղի շուրջ տեղի ունեցող իրադարձությունների համատեքստում, չաշխատեց: Չնայած եթե ուշադիր լինեինք, կարող էինք ի սկզբանե կռահել, որ չի աշխատելու, որովհետև հենց նույն Հայաստանի՝ ԵԱՏՄ անդամ դառնալու համատեքստում կային շատ հանրահռչակ, ՀՀ հանրության շրջանում հայտնի քննարկումների առիթ դարձած տեսարաններ, երկխոսություններ, բայց ժամանակի ընթացքում էլի հետաքրքրությունը մարեց»,- ասել է նա:
Ըստ Փաշինյանի՝ երկրորդ դեպքը 2021թ. մայիսն էր, իսկ երրորդը՝ 2022թ. սեպտեմբերը, երբ պաշտոնական Երևանը երկրի տարածքային ամբողջականության բերումով դիմել էր ՀԱՊԿ-ին. «Վերջինիս արձագանքը երկու անգամ հետևյալն էր՝ կարծես սահմանները դելիմիտացված չեն, և հարց՝ արդյոք եղե՞լ է ներխուժում ՀՀ տարածք, թե՞ ոչ»:
Վարչապետը շեշտել է, որ դրանից հետո ստիպված էին ուղիղ առերեսվել հարցին, թե արդյոք ՀԱՊԿ-ը ճանաչո՞ւմ է ՀՀ տարածքային ամբողջականությունը, ապա նաև հարցին, թե արդյոք Հայաստանն ինքը ճանաչո՞ւմ է իր տարածքային ամբողջականությունը։ Փաշինյանը հավելել է, որ ճանաչել է Ադրբեջանի տարածքային ամբողջականությունը, որպեսզի ճանաչի Հայաստանի տարածքային ամբողջականությունը, որովհետև այլ ճանապարհ չկա:
Երևանը սառեցրել էր իր մասնակցությունը ՀԱՊԿ-ին։ Հայաստանը շարունակում է մնալ ՀԱՊԿ անդամ, սակայն արդեն մոտ երկու տարի չի վճարում կազմակերպության անդամավճարները։ ՌԴ ԱԳ փոխնախարար Ալեքսանդր Պանկինը մարտին հայտարարել էր, որ եթե Հայաստանը մինչև 2025 թվականի ավարտը շարունակի նույն քաղաքականությունը, կազմակերպության անդամ երկրները «կարող են քննարկել տարբեր սցենարներ»։
Փաշինյանը հուլիսին հայտարարել էր, որ ավելի հավանական է ՀԱՊԿ-ից դուրս գալը, քան անդամակցության ապասառեցումը:
