Եթե մինչև 2025 թվականի վերջ Հայաստանը չվճարի Հավաքական անվտանգության պայմանագրի կազմակերպության (ՀԱՊԿ) բյուջեում իր ներդրումը, ապա կազմակերպության անդամ երկրները «կարող են դիտարկել տարբեր սցենարներ», ասել է ՌԴ փոխարտգործնախարար Ալեքսանդր Պանկինը` նշելով, որ այս դեպքում կստեղծվի իրավիճակ, երբ ՀԱՊԿ անդամ երկիրը երկու տարի շարունակ չի վճարել իր ներդրումը։
«Ոչ ոք, երևի, ոչ մեկին չի վռնդի, ոչ ոք ինքնաբերաբար չի հեռանա։ Բայց, գուցե, հնարավոր լինի դիտարկել երկրների հետագա փոխգործակցության հարցը։ Սա չպետք է ընդունվի որպես ինքնուրույն հեռանալ կամ դուրս գալ, ոչ մի դեպքում»,- ընդգծել է Պանկինը։
Նրա խոսքով՝ կան դեպքեր, երբ այլ երկրներ պարտքեր են ունեցել տեխնիկական, ֆինանսական և այլ պատճառներով։ Ըստ փոխարտգործնախարարի՝ ՀԱՊԿ-ում Երևանի հետ երկխոսությունը շարունակվում է «ամբողջ օրակարգով»։ Պանկինը հույս է է հայտնել, որ իրադարձությունները լավ ավարտ կունենան։
2024 թվականի դեկտեմբերի 6-ին Ալեքսանդր Պանկինը հայտարարել էր, որ Հայաստանը ՀԱՊԿ բյուջե վճարում չկատարելու պատճառով պարտք է ստեղծել։ Դեկտեմբերի 11-ին ՌԴ ԱԳՆ պաշտոնական ներկայացուցիչ Մարիա Զախարովան նշել էր, որ Հավաքական անվտանգության խորհուրդը Հայաստանին կարող է զրկել ձայնի իրավունքից, եթե երկու տարվա ընթացքում չմարվեն կազմակերպության բյուջեին ունեցած պարտքերը։
2024 թվականի փետրվարի 22-ին ՀՀ վարչապետ Նիկոլ Փաշինյանը France 24 հեռուստաալիքին տված հարցազրույցում ասել էր, որ Հայաստանը սառեցրել է իր մասնակցությունը ՀԱՊԿ-ին։ Իր հերթին՝ ՀԱՊԿ-ը հայտարարել էր, որ կազմակերպությունը Հայաստանից պաշտոնական հաղորդագրություն չի ստացել իր մասնակցությունը կասեցնելու մասին։ ՌԴ ԱԳՆ-ն փետրվարի 23-ին ՀԱՊԿ-ի մասին Փաշինյանի խոսքերից հետո Երևանից պարզաբանում էր ակնկալել, իսկ մարտի 6-ին հայտարարել, որ ՌԴ-ն հայկական կողմին Երևանի համար խնդրահարույց հարցերի շուրջ խորհրդակցությունների է հրավիրել։ Փաշինյանը մարտի 12-ին ասել էր, որ Հայաստանը դուրս կգա ՀԱՊԿ-ից, եթե իր բարձրացրած հարցերի պատասխանները չստանա։
Հայաստանի արտաքին հետախուզական ծառայությունը հունվարի 23-ի զեկույցում կանխատեսել էր, որ ՀԱՊԿ-ի «անարդյունավետությունն ու անկարողությունը» Հարավային Կովկասի մարտահրավերներին արձագանքելու հարցում 2025 թվականին չի փոխվի։ ԱՀԾ-ն անհավանական էր համարել, որ 2025 թվականին Հայաստանի անդամակցությունը ՀԱՊԿ-ին սառեցնելու հիմքերը կվերացվեն, ինչը կհանգեցնի «անվտանգության այս կառույցի հեղինակության խաթարմանը և մյուս անդամ երկրների համար եզրակացություններ անելուն»։
