Վարչապետի տիկին Աննա Հակոբյանը մի քանի ամիս է՝ նախաձեռնել է «Կրթվելը նորաձև է» շարժումը: Նպատակը, ըստ նրա, յուրաքանչյուր քաղաքացուն կրթվելու և նորովի մտածելու շարժառիթ հաղորդելն է։ Շարժման շրջանակում կազմակերպվում են հանդիպումներ, դասախոսություններ և քննարկումներ տարբեր համայնքներում՝ ընդգրկելով ինչպես քաղաքային, այնպես էլ գյուղական բնակավայրերը:
Այդ միջոցառումներին, որոնք վերջերս նաև մամուլի քննարկան առարկան էին դարձել, մասնակցում են պետական բարձրաստիճան պաշտոնյաներ, այդ թվում՝ վարչապետ Նիկոլ Փաշինյանը, որը ևս բանախոսում է:
Armenia Today-ի նկարահանող խումբը երևանցիներից հետաքրքրվել է, թե տեղյա՞կ են արդյոք նախաձեռնության մասին, ցանկություն ունե՞ն մասնակցել և տեսնո՞ւմ են քաղաքական ենթատեքստ։
Հարցվածների մեծ մասն ասել է, որ ոչ մի դեպքում չէին ցանկանա մասնակցել Աննա Հակոբյանի «Կրթվելը նորաձև է» դասերին, ոմանք էլ նշել են, որ սա քաղաքական քայլ է՝ որակելով նախընտրական քարոզարշավ։
«Չեմ կարծում, որ դա ճիշտ է։ Չգիտեմ, թե ինչ է կրթում, ում է կրթում, չեմ ուզում ավելորդ բաներ ասել։ Քարոզարշա՞վ են անում, թող դա անեն օրինական ձևով, ոչ թե այդպես, ի՞նչ կրթել։ Ո՞ւմ է կրթում, դասախոսների՞ն, ակադեմիկոսների՞ն, իսկ իրեն ո՞վ պետք է կրթի»,- ասել է հարցվածներից մեկը։
Մեկ այլ քաղաքացի էլ նշել է, որ չի համակրում վարչապետին ու նրա կնոջը, հետևաբար, ցանկություն չունի մասնակցելու․ «Իրենց անուն-ազգանունը լսել չեմ ուզում, ինձ հետաքրքիր չեն»։
Հարցված քաղաքացիներից երկուսն էլ ասել են, որ ուրախ կլինեին մասնակցել Աննա Հակոբյանի «Կրթվելը նորաձև է» դասերին, սակայն համարում են, որ իրենք արդեն մեծահասակ են նման ծրագրերի համար։
«Դասընթացի մասնակցելու համար իմ ժամանակը չէ, բայց լավ միջոցառում է։ Իմ տարիքն այն չէ։ Եթե Աննա Հակոբյանը վարչապետի կինն է, ուրեմն լավ բաներ կուսուցանի»,- ասել է տարեց տղամարդը։
Մանրամասները՝ Armenia Today-ի տեսանյութում։
