«Բարգավաճ Հայաստանի» ներկայացուցիչներն ակցիա իրականացրեցին Կենտրոնական ընտրական հանձնաժողովի շենքի մոտ՝ ԿԸՀ-ին մեղադրելով ընդդիմադիր ուժերի քվեների հետ կապված «թվաբանական աճպարարություններ իրականացնելու» մեջ և պահանջեցին վերաքվեարկություն անցկացնել այն երեք տեղամասերում, որոնց արդյունքներն անվավեր են ճանաչվել։
Ակցիայի ուղիղ հեռարձակումն իրականացնում էր Armenia Today-ի յութուբյան ալիքը։
Ակցիայի ընթացքում ընդդիմադիրները ԿԸՀ նախագահ Վահագն Հովակիմյանին փոխանցեցին ջրաներկ, վրձիններ և թուղթ։
«Քիչ անց մեր գործընկերները Վահագն Հովակիմյանի համար նախատեսված մի փոքրիկ նվեր կփոխանցեն, որպեսզի, երբ Կենտրոնական ընտրական հանձնաժողովի նախագահը բուռն և անհաղթահարելի ցանկություն ունենա նկարչությամբ զբաղվելու, կարողանա այդ պարագաներով նկարչությունն իրականացնել, այլ ոչ թե թվաբանական աճպարարություններ իրականացնի քաղաքական տարբեր ընդդիմադիր ուժերի քվեների հետ»,- հայտարարել է ԲՀԿ մամուլի խոսնակ Իվետա Տոնոյանը։
Մեկնաբանելով վերաքվեարկության իրավական հիմքերը՝ ակցիայի մասնակիցները հղում արեցին Ընտրական օրենսգրքի 101-րդ հոդվածին։ Ըստ այդ հոդվածի, եթե առանձին տեղամասերի արդյունքների անվավեր ճանաչելը ընդհանուր պատկերի վրա ազդեցություն ունի, ապա ԿԸՀ-ն պարտավոր է պահանջել կրկնակի քվեարկություն։
Կուսակցության ներկայացուցիչները նաև հայտնեցին, որ ԿԸՀ անդամներին են փոխանցել բացահայտված անճշտությունների հետ կապված հիմնավորումներն ու նյութերը։ Նրանց խոսքով՝ ընդամենը 100 տեղամասերի տվյալների ուսումնասիրության արդյունքների համաձայն՝ արձանագրություններով ամրագրված մասնակիցների քանակի և ԿԸՀ կայքում հրապարակված մասնակիցների քանակի միջև կա էական տարբերություն. թվերը տարբերվում են շուրջ 270-ով։
ԲՀԿ ներկայացուցիչ, քաղաքագետ Սուրեն Սուրենյանցը հայտարարեց, որ այս փուլում կուսակցությունը պահանջում է վերաքվեարկություն, սակայն չի բացառում ամբողջ արդյունքները բողոքարկելու և դատական մարմիններում վիճարկելու հնարավորությունը։
«Եթե այս «բեսպրեդելը» շարունակվի, աստիճանաբար այս հավաքը ձնագնդիի պես մեծանալու է, և իշխանությունը կզգա հասարակության ցասումը»,- հայտարարել է նա։
Սուրենյանցի խոսքով՝ ընտրության իրավունքի պաշտպանության հարցում ընդդիմադիր ուժերը պետք է կոնսոլիդացված լինեն։ Նա նաև պաշտոնապես բացառեց որևէ կոմպրոմիս և համագործակցություն «Քաղաքացիական պայմանագրի» և վարչապետ Նիկոլ Փաշինյանի հետ։
«Նիկոլ Փաշինյանի հետ մենք մի խոսակցություն կարող ենք ունենալ երբևէ, դա նրա հեռացման պայմաններն են»,- հայտարարել է նա։
Սուրենյանցն ընդգծել է, որ կուսակցությունը չի վիճարկում արդյունքներն անվավեր ճանաչելու ԿԸՀ-ի իրավունքը, ընդունելով, որ ԿԸՀ-ն իր իրավունքն է իրացրել, սակայն օրենքի խախտում է համարում վերաքվեարկություն չնշանակելը։
Նրա կարծիքով՝ իշխանությունները փորձում են ԲՀԿ-ին ֆիլտրել և չթողնել խորհրդարան, քանի որ կուսակցության մուտքը կոնֆիգուրացիան փոխում է և զրկում է «Քաղաքացիական պայմանագրին» միայն իրենց խմբակցությունով 3/5 ապահովելու հնարավորությունից։
