«Ուժեղ Հայաստան» դաշինքը հայտարարել է, որ Կենտրոնական ընտրական հանձնաժողովը (ԿԸՀ) չի հաշվել հունիսի 7-ի խորհրդարանական ընտրությունների ժամանակ 7 ընտրատեղամասում դաշինքի օգտին տրված շուրջ 580 ձայն։
Ըստ դաշինքի տվյալների, որոնք հրապարակվել են տեղամասային հանձնաժողովների արձանագրություններից քաղվածքների ստուգումից հետո, քաղաքական ուժը 38/53 տեղամասում ստացել է 136 ձայն, որոնցից ոչ մեկը ԿԸՀ-ի կողմից չի գրանցվել։
27/26 ընտրատեղամասում 183 ձայնից հաշվարկվել է 16-ը, 27/7 ընտրատեղամասում ԿԸՀ-ն հաշվել է 135 քվեաթերթիկից 10-ը, 24/11 ընտրատեղամասում դաշինքն ստացել է 220 ձայն, որոնցից ԿԸՀ-ն հաշվել է 138-ը։ 31/2 ընտրատեղամասում հանձնաժողովը հաշվել է 224 ձայնից 208-ը, 4/48 ընտրատեղամասում՝ 223-ից 200-ը, 17/2 ընտրատեղամասում՝ 212-ից 181-ը։
Դաշինքի մամուլի խոսնակ Մարիաննա Ղահրամանյանը հայտնել է, որ սեփական ռեսուրսներով իրականացված հաշվարկների վերստուգման արդյունքում պարզվել է, որ «Ուժեղ Հայաստանի» ձայները տրվել են մերձիշխանական սատելիտ ուժերին։ Նա նշել է, որ տասնյակ ընտրատեսամասերում վերահաշվարկի դիմումներ են ներկայացրել և մանդատները վերցնելու կամ չվերցնելու որոշումից առաջ պետք է սթափ գնահատեն իրավիճակը։
«Որևէ որոշում կայացնելուց առաջ պետք է իրավիճակը վերլուծենք, սթափ գնահատական տանք, ապա կայացնենք այն որոշումը, որը բխելու է մեր հայրենիքի լավագույն շահից»,- նշել է նա։
Հունիսի 7-ին Հայաստանում անցկացվել են Ազգային ժողովի ընտրություններ, որոնց մասնակցել է 18 քաղաքական ուժ՝ 16 կուսակցություն և 2 դաշինք։ Ընտրությանը, ԿԸՀ նախնական տվյալներով, մասնակցել է 1 477 736 (58,94%) մարդ՝ 2 503 976 ընտրողից: ԿԸՀ-ի նախնական տվյալներով՝ անցողիկ շեմը հաղթահարել է քաղաքական երեք ուժ՝ «Քաղաքացիական պայմանագիրը» (49,825%), «Ուժեղ Հայաստան» դաշինքը (23,281%) և «Հայաստան» դաշինքը (9,934%)։
«Բարգավաճ Հայաստան» կուսակցությունը, որը նախնական արդյունքով չի հաղթահարել անցողիկ 4%-ի շեմը, վերահաշվարկ է պահանջել։ Վերջնական արդյունքը կհրապարակվի հունիսի 14-ին՝ ինքնաշխատ եղանակով վերահաշվարկներից հետո։ Ընտրության արդյունքները վիճարկելու մտադրության մասին հայտարարել էին «Հայաստան» դաշինքի առաջնորդ Ռոբերտ Քոչարյանը և «Միասնության թևեր» կուսակցության նախագահ Արման Թաթոյանը։
«Ուժեղ Հայաստանը» հայտարարել էր, որ ԿԸՀ տվյալները չեն արտացոլում ընտրությունների իրական արդյունքները։ Ընդդիմությունը վարչապետ Նիկոլ Փաշինյանին մեղադրել էր իշխանության յուրացման փորձի և ԿԸՀ-ին ճնշելու մեջ։
Կարդացեք նաև՝
Ի՞նչ խախտումներ են արձանագրվել ընտրատեղամասերում
