Երևանի քաղաքային իշխանության ներսում ներկայումս նկատվում է աշխատանքային լարվածության աճ, որը կապված է մայրաքաղաքում իշխող քաղաքական ուժի վարկանիշի բարձրացման փորձերի հետ, հայտնել է «Ժողովուրդ» օրաթերթը։
Ըստ հրապարակման՝ «Քաղաքացիական պայմանագիր» (ՔՊ) կուսակցությունն իրականացնում է ներքին հարցումներ՝ պարզելու Երևանում ընտրողների շրջանում աջակցության մակարդակն ավելացնելու հնարավոր ուղիները։ Այս համատեքստում քաղաքային իշխանությունը խստացրել է պահանջները վարչական շրջանների ղեկավարների նկատմամբ՝ նրանցից ակնկալելով առավել բարձր արդյունավետություն և քաղաքական ակտիվություն, հայտնում է պարբերականը։
Թերթը նշել է, որ այն վարչական շրջաններում, որտեղ ղեկավար պաշտոններ զբաղեցնում են «Հանրապետություն» կուսակցության ներկայացուցիչները, գործընթացներին ներգրավվում են նրանց ազդեցիկ անդամներին։ Իշխող կուսակցությունն էլ, ըստ թերթի տեղեկությունների, իր հերթին գործի է դրել իր ավելի ազդեցիկ անդամներին, օրինակ՝ Նոր Նորք վարչական շրջանում աշխատանքների համակարգման պատասխանատվությունն ստանձնել է ՀՀ աշխատանքի և սոցիալական հարցերի նախարար Արսեն Թորոսյանը։
Հրապարակման համաձայն՝ ստեղծված իրավիճակը հանգեցրել է ներքին հակասությունների։ Քաղաքապետարանի կողմից ներկայացվող պահանջներին ի պատասխան՝ վարչական շրջանների ղեկավարները մատնանշում են քաղաքային ենթակառուցվածքների խնդիրները։ Որպես բնակչության դժգոհության հիմնական պատճառներ նշվել են փողոցների անբարեկարգ վիճակը, ասֆալտապատման ցածր որակը և թերի շինարարական աշխատանքները։
ԶԼՄ-ները մարտին գրել էին, որ կուսակցության երևանյան ներկուսակցական քարոզարշավից հետո, երբ իշխանության ներկայացուցիչները որոշ դեպքերում լավ ընդունելության չէին արժանացել, կուսակցությունում վերլուծել են իրավիճակը։ Ըստ թերթի՝ հիմնական թիրախ էր ընտրվել քաղաքապետ Տիգրան Ավինյանը, որի աշխատանքի հետ էին կապել բնակչության նման վերաբերմունքը։
