«Թրամփի ուղի հանուն միջազգային բարգավաճման և խաղաղության» (TRIPP) նախագծի ներքո օգուտները կբացեն առևտրային ճանապարհներ և նորից կմիացնեն Հայաստանը համաշխարհային շուկայի հետ, հայտարարել է ՀՀ-ում ԱՄՆ դեսպան Քրիստինա Քվինը:
ՀՀ-ում ԱՄՆ-ի առևտրի պալատում իր ելույթում նա շեշտել է, որ «Թրամփի ուղին» ոչ միայն նպաստում է տարածաշրջանային փոխկապակցվածության ընդլայնմանը, այլև Հայաստանին հնարավորություն է տալիս ընտրելու գործընկերներ արտահանման, ներմուծման ու համատեղ նախաձեռնությունների համար։
«Ընտրության այս ազատությունը նշանակում է, որ Հայաստանը կարող է բանակցել ամենանպաստավոր պայմաններով կոմերցիոն պայմանավորվածություններ, ինչը շահեկան կլինի ՀՀ բիզնեսի և սպառողների համար»,- նշել է դեսպանը:
Ըստ Քվինի՝ տրանսպորտային ենթակառուցվածքների շուրջ աշխատանքն սկսվում է «Թրամփի ուղու» շրջանակում, սակայն դրանով չի սահմանափակվում։ Նա շեշտել է՝ Թուրքիայի և Ադրբեջանի հետ հարաբերությունների կարգավորմանը զուգընթաց՝ Վաշինգտոնը պատրաստ է աջակցել Հայաստանի լիարժեք ինտեգրմանն արևելք-արևմուտք կոմերցիոն օղակներում։
Այժմ, նրա խոսքով, ՀՀ-ն ու ԱՄՆ-ն աշխատում են Հայաստանի կառավարության հետ՝ ձևավորելու «Թրամփի ուղու» և հուշագրերից բխող անելիքների մշակման ու իրականացման կառույցներ։ Առաջինը՝ ձևավորվում են երկու միջկառավարական աշխատանքային խմբեր, որոնք ուղղորդելու են հուշագրերի ու «Թրամփի ուղու» իրականացումը։ Աշխատանքային խմբերն արդեն ստեղծվել են, և մինչև տարեվերջ կանցկացնեն իրենց անդրանիկ նիստերը։ Երկրորդը, ինչպես նշել է ԱՄՆ դիվանագետը, «Թրամփի ուղու» պլանավորման ու կառուցման աշխատանքները ղեկավարելու նպատակով հայ-ամերիկյան կառույցի ձևավորումն է, որի համար իրավական հարցերն են հստակեցվում:
Օգոստոսի 8-ին Վաշինգտոնում Հայաստանի և Ադրբեջանի ղեկավարներն ԱՄՆ-ի միջնորդությամբ հռչակագիր էին ստորագրել, որով նաև նախատեսվում է ստեղծել TRIPP երթուղի: ՀՀ փոխարտգործնախարարը նոյեմբերի վերջին հայտնել էր, որ TRIPP-ի շուրջ այս փուլում հայ-ամերիկյան համատեղ ընկերության ստեղծման վերաբերյալ քննարկում է ընթանում:
