Ռեփեր և երաժշտական պրոդյուսեր Փի Դիդին (իսկական անունը՝ Շոն Քոմբս-AT) դատապարտվել է չորս տարի և երկու ամիս ազատազրկման՝ մարմնավաճառությանն օժանդակելու համար, հայտնում է Forbes-ը։
ԱՄՆ դաշնային դատավոր Արուն Սուբրամանյանը նաև 500 000 դոլար տուգանք է նշանակել։
Հուլիսին ատենակալների պալատը Դիդիին մեղավոր էր ճանաչել մարդկանց մարմնավաճառությամբ զբաղվելու համար տեղափոխելու մեջ։ Նրան, ընդհանուր առմամբ, մեղադրանք էր առաջադրվել հինգ դրվագով։ Ատենակալների պալատը Դիդիին անմեղ էր ճանաչել շորթման դավադրության մեկ դրվագով և սեռական թրաֆիքինգի երկու դրվագով։
Պրոդյուսերի փաստաբանները դատարանին խնդրել էին նրան դատապարտել ոչ ավելի, քան 14 ամիս ազատազրկման, ինչը հավասար կլիներ Բրուքլինի կալանավայրում Դիդիի անցկացրած ժամանակին։ Մեղադրողները, սակայն, պահանջել էին 11 տարի ազատազրկում և 500 000 դոլար տուգանք՝ նշելով, որ «հանցագործությունների համար պատիժը պետք է հաշվի առնի, թե ինչպես է նա դրանք կատարել»։
Որոշման հրապարակումից առաջ դատավոր Սուբրամանյանին ուղղված նամակում Դիդին նշել էր, որ ինքը «լիակատար պատասխանատվություն» է կրում իր գործողությունների համար, ներողություն է խնդրում բոլոր նրանցից, ում վիրավորել է, և խնդրում է մեղմ դատավճիռ կայացնել։
Քոմբսը ձերբակալվել էր անցյալ տարվա սեպտեմբերին՝ Նյու Յորքում։ Մեղադրական եզրակացության մեջ նշվում էր, որ տասնամյակից ավելի ղեկավարել է «սեռական հանցագործությունների կայսրություն» և «հետևողականորեն և համատարած կերպով բռնության է ենթարկել մարդկանց»։ Հետագայում քննիչներն ընդլայնել էին ռեփերի դեմ մեղադրանքները՝ ընդգրկելով ավելի երկար ժամանակահատված՝ 2004-ից մինչև 2024 թվականը։
2024-ի հոկտեմբերին հայտնի էր դարձել, որ Դիդիին սպառնում է ավելի քան 100 նոր հայց սեռական բռնության և շահագործման վերաբերյալ: 25 անձ, ովքեր, ամենայն հավանականությամբ, դատական հայց կներկայացնեն, ենթադրյալ հանցագործությունների պահին անչափահաս էին: Զոհերից ամենաերիտասարդը 9-ամյա տղա է։
