«Հայաստանի էլեկտրական ցանցեր» ընկերության տնօրենների խորհրդի նախագահ և «Տաշիր» ընկերությունների խմբի փոխնախագահ Նարեկ Կարապետյանը հայտարարել է, որ սպասում է իր կալանավորմանը։
Հուլիսի 8-ի առավոտյան իրավապահ մարմինները խուզարկություններ էին իրականացրել նրա տանը, ինչպես նաև ընկերության գլխավոր գրասենյակում։ Քննչական կոմիտեն Armenia Today-ին հայտնել էր, որ իրականացվում են անհետաձգելի քննչական գործողություններ՝ կոմիտեի տնտեսական հանցագործությունների գլխավոր վարչությունում հարուցված քրեական գործերի շրջանակում։
«Սպասում էինք այս ամենին, երևի մի քիչ էլ ուշացան։ 90 տոկոսով կձերբակալեն ինձ, բայց չգիտեմ՝ ինչի համար»,- լրագրողներին ասել է Կարապետյանը։
Նա նշել է, որ չգիտի, թե կոնկրետ ի՞նչ գործի շրջանակում են գործում ուժայինները, բայց ենթադրել է, որ դա կարող է կապված լինել խաղաղ ակցիաներին իր մասնակցության հետ։
«Ինձ համար հստակ չէ, թե ինչ գործի շրջանակում է սա արվում, հնարավոր է՝ կապված է հանրահավաքների հետ»,- նշել է նա։
Կարապետյանը հավելել է, որ իշխանությունների գործողություններն իր համար հասկանալի են։
«Թող անեն այդ քայլերը, տեսնենք՝ դրանք իրենց հաջողությո՞ւն, թե՞ անհաջողություն են բերելու»,- նշել է նա։
Լրագրողի հարցին, թե կոնկրետ ի՞նչ է առգրավվել իր տնից, Կարապետյանը պատասխանել է, որ իրավապահներն առգրավել են «երկու գլխարկ, երեխաների լուսանկարներով ֆլեշկա, չորս iPhone և մի քիչ գումար»։
Հուլիսի 2-ին խուզարկություններ էին սկսվել Երևանում գտնվող «Տաշիր գրուպ»-ի գլխավոր գրասենյակում։ Հուլիսի 4-ին Քննչական կոմիտեն Armenia Today-ին տեղեկացրել էր, որ ընկերության գրասենյակում կատարված խուզարկություններից հետո հարուցված գործի շրջանակում կալանավորվածների թիվը հասել է չորսի։
Նարեկ Կարապետյանը կալանավորված գործարար, «Տաշիր» ընկերությունների խմբի նախագահ Սամվել Կարապետյանի եղբորորդին է: Հուլիսի 4-ին հաջակցություն Կարապետյանի ակցիայի ժամանակ նա հայտարարել էր, որ ազգի մեջ «բաժանումը ստեղծվել է, որ մեզ հեշտ կառավարեն»: «Մինչդեռ միակ բաժանումը, որ մեր մեջ պետք է լինի հետևյալը պետք է լինի՝ կլինենք կառուցող, թե՞ քանդող»: Այդ նույն ակցիայի ընթացքում ընթերցվել էր Սամվել Կարապետյանի ուղերձը, որում նշվում էր, որ վարչապետ Նիկոլ Փաշինյանն այլևս անելիք չունի Հայաստանում։ Կարապետյանը շեշտել էր նոր քաղաքական ուժ ձևավորելու անհրաժեշտության մասին։
