Հակակոռուպցիոն կոմիտեն հայտնել է Երևանի նախկին քաղաքապետ Գագիկ Բեգլարյանի գործով նախաքննության ավարտի և գործի նյութերը դատարան ուղարկելու մասին։ Կոմիտեի հաղորդագրութան մեջ նշված են միայն նախկին քաղաքապետի անվան սկզբնատառերը։
Ըստ ՀԿԿ-ի՝ Բեգլարյանը 2004-2010 թթ. ընթացքում 2 մլրդ 327 մլն դրամի 27 անշարժ գույքն իր հետ փոխկապակցված անձանց սեփականությունը դարձնելու նպատակով պաշտոնեական դիրքն օգտագործել է ծառայության շահերին հակառակ և 2004-2017 թթ. ընթացքում օրինականացրել հանցավոր ճանապարհով ստացված գույքը:
Նրան, Կենտրոն համայնքի նախկին ղեկավարին և նրա տեղակալին մեղադրանքներ են ներկայացվել բազմաթիվ դրվագներով փողերի լվացման, դրան դրդելու և պաշտոնեական լիազորությունները չարաշահելու համար:
Նշվում է, որ նախկին քաղաքապետն ավելի քան 233 մլն դրամի շուկայական արժեք ունեցող թիվ 140 մանկապարտեզն ավագանու որոշմամբ վերակազմակերպել և միացրել է նույն համայնքի մեկ այլ մանկապարտեզի:
Այնուհետև նա նշված անշարժ գույքը շուկայականից անհամեմատ ցածր գնով՝ 23 մլն դրամով, ձևական առուվաճառքի պայմանագրով օտարել է իր հետ փոխկապակցված անձին և առուվաճառքի պայմանագրով 24 մլն դրամով օտարել իր հորը:
Ըստ հաղորդագրության՝ Բեգլարյանի հետ փոխկապակցված անձանց օտարվել է Երևան համայնքին սեփականության իրավունքով պատկանող ավելի քան 2 մլրդ դրամի ևս 26 անշարժ գույք, մի դեպքում՝ ուղղակի վաճառքի, մյուս դեպքում՝ նվիրատվության կամ ձևական աճուրդի եղանակով: Արդյունքում՝ նշված ամբողջ գույքը փաստացի դարձել է Բեգլարյանի սեփականությունը:
Նախաքննության ընթացքում նախկին քաղաքապետի կողմից վերականգնվել է շուրջ 210 մլն դրամ, ինչպես նաև պետությանը պատճառված վնասի չափով արգելանք է դրվել վերը նշված 27 անշարժ գույքի վրա:
Բեգլարյանի նկատմամբ քրեական հետապնդումը հարուցվել էր 2022 թվականի նոյեմբերին։ Նա քաղաքապետի պաշտոնում նշանակվել է 2009 թվականին, 2012-ին ընտրվել է ԱԺ պատգամավոր, իսկ 2012-ին՝ տրանսպորտի և կապի նախարար:
