Քննչական կոմիտեն մեկնաբանել է Մասիսի նախկին քաղաքապետ Դավիթ Համբարձումյանի եղբոր՝ Գոռ Համբարձումյանի ձերբակալության վերաբերյալ ԶԼՄ-ներում տարածված տեղեկությունները։
Գերատեսչությունից Armenia Today-ին հայտնել են Գ. Հ.-ի ձերբակալության մասին՝ առանձնապես խոշոր չափերով խարդախության և փողերի լվացման գործի շրջանակում:
ՔԿ-ն չի բացահայտել ձերբակալվածի տվյալները՝ նշելով միայն վերջինիս անվան և ազգանվան սկզբնատառերը։ Իրավապահ մարմինները նրան մեղադրում են անձնական կամ ընտանեկան կյանքի գաղտնիությունը խախտելու, փաստաթղթերի կեղծման, ինչպես նաև առանձնապես խոշոր չափերով խարդախության և հանցավոր ճանապարհով ստացված եկամուտների օրինականացման համար։
Գերատեսչության փոխանցմամբ՝ քրեական վարույթի նախաքննության ընթացքում վերջինիս նկատմամբ հարուցվել է հանրային քրեական հետապնդում՝ Քրեական օրենսգրքի 204-րդ հոդվածի 1-ին մասով Քրեական օրենսգրքի 204-րդ հոդվածի 1-ին մասով (անձնական կամ ընտանեկան կյանքի գաղտնիությունը խախտելը, առավելագույն պատիժը՝ 1 տարվա ազատազրկում), 457-րդ հոդվածի 2-րդ մասով (փաստաթղթեր կեղծելը, առավելագույն պատիժը՝ 3 տարվա ազատազրկում), 255-րդ հոդվածի 3-րդ մասի 3-րդ կետով (առանձնապես խոշոր չափերով խարդախությունը, առավելագույն պատիժը՝ 5 տարվա ազատազրկում ) և 296-րդ հոդվածի 3-րդ մասի 3-րդ կետով (առանձնապես խոշոր չափերով փողերի լվացումը, առավելագույն պատիժը՝ 12 տարվա ազատազրկում):
2022 թվականի սեպտեմբերին Գոռ Համբարձումյանն արդարացվել էր պոռնկությամբ զբաղվելուն դրդելու գործով։ Համբարձումյանն անցնում է 2019 թվականին հարուցված քրեական գործով և մեղադրվում է 2018 թվականի իրադարձությունների ժամանակ ցուցարարների դեմ զենք օգտագործելու մեջ։
2025 թվականի հոկտեմբերի 28-ին Հայաստան ժամանելուն պես Մասիսի արդեն նախկին քաղաքապետ Դավիթ Համբարձումյանը կալանավորվել էր։ Նրա կալանքը հունվարին փոփոխվել էր տնային կալանքով:
