Ծափաթաղից 7-օրյա որոնումներից հետո սպանված հայտնաբերված 3-ամյա Տիգրան Օվանեսովի հայրը երեխային կյանքից զրկել է ձեռքով կոկորդից սեղմելու եղանակով, տեղեկանում ենք Քննչական կոմիտեից։
ՔԿ-ն ավարտվել է երեխայի սպանության դեպքի առթիվ նախաձեռնված քրեական վարույթի նախաքննությունը։ ՔԿ-ն նախաքննությամբ պարզել է, որ սպանությունից հետո նա երեխայի դիակը սկզբում թաքցրել է դաշտամիջյան տարբեր հատվածներում, ապա տեղափոխել Ճամբարակ համայնքի Ջիլ բնակավայր տանող խաչմերուկին հարակից դաշտամիջյան հատված, որտեղ էլ հայտնաբերվել էր երեխայի դին։
«Երեխայի մարմնի գլխի շրջանում հայտնաբերվել են մարմնական վնասվածքներ։ Դատաբժշկական փորձաքննության եզրակացության համաձայն՝ 3-ամյա երեխայի մահը վրա է հասել մեխանիկական շնչահեղձության հետևանքով՝ պարանոցի օրգանների բութ առարկաներով սեղմման արդյունքում»,- հավելել է ՔԿ-ն։
Քրեական վարույթը մեղադրական եզրակացությամբ ուղարկվել է հսկող դատախազին՝ այն հաստատելու և դատարան ուղարկելու միջնորդությամբ։
Երեքամյա Տիգրանը կորել էր հոկտեմբերի 27-ին։ ՔԿ-ն նրա անհետացման դեպքի առնչությամբ քրեական վարույթ էր նախաձեռնել։ Նոյեմբերի 2-ին երեխայի մարմինը հայտնաբերվել էր Ծափաթաղի հարակից դաշտամիջյան հատվածում։ ՀՀ ներքին գործերի նախարար Արփինե Սարգսյանը հայտնել էր, որ Տիգրանին հայրն է խեղդամահ արել։
