Էրեբունու կրակոցների գործով ձերբակալել են ՀՀ ոստիկանության ներքին անվտանգության վարչության նախկին պետ, ՃՈ նախկին պետ և ոստիկանության գնդապետ Արմեն Հակոբյանի եղբորը՝ Գուրգեն Հակոբյանին, հայտնում է «Ժողովուրդը»։
Ըստ թերթի տեղեկությունների՝ վերջինիս ձերբակալել են քրեական ենթամշակույթին հարելու մեղադրանքով, ձերբակալումը պայմանավորված է Էրեբունու Մուրացան 109 հասցեում գտնվող նկուղային հարկում, ըստ բնակիչների՝ խաղատան գործունեությամբ։
Նշվում է, որ մահվան ելքով կրակոցներից 1 շաբաթ առաջ կրակոցների կազմակերպիչները վիճել և հայհոյանքներ են հնչեցրել՝ բիզնեսում առաջացած անհամաձայնության, բիզնեսը չկիսելու պատճառով:
Թերթի տեղեկություններով՝ միջադեպի հետ առնչություն ունեցողներն արտերկրում բիզնես ունեն, մասնավորապես՝ ծխախոտի սև շուկայի մեջ են ներգրավված, ու այլ անձանց բիզնեսում հայտնվելը խիստ ծանր են տարել և սկսել են հաշիվներ մաքրել միմյանց հետ:
Թերթը հավելել է, որ գործով իրավապահները հարցաքննել են 30-ից ավելի անձանց, այդ թվում՝ կնոջ։ 4 անձի նկատմամբ Քրեական հետապնդում է հարուցվել և ներկայացվել է դատարան կալանավորելու նպատակով: Կալանավորվածը Արմեն Օհանյանն է:
Հուլիսի 18-ին Armenia Today-ը, հղում անելով իր աղբյուրներին, հայտնել էր, որ նույն օրը երեկոյան Մուրացան փողոցում կրակոցներ էին հնչել, ինչի հետևանքով մեկ մարդ մահացել էր։ ՆԳՆ-ն այն ժամանակ հաստատել էր AT-ի տեղեկությունը և հայտնել, որ դեպքի վայրում աշխատում են ոստիկանության օպերատիվ խմբերը։ Մահացածը Մուրացան փողոցի հարակից՝ Բելինսկու փողոցի բնակիչ 20-ամյա Վահե Մկրտչյան էր, վիրավորվել էր նաև 15-ամյա Գ․ Մարգարյանը։
Ավելի ուշ ՔԿ-ն հայտնել էր, որ հնչած կրակոցների և սպանության դեպքի առնչությամբ քրեական վարույթ է նախաձեռնվել, մեկ անձ ձերբակալվել է։
