«ՀայաՔվե» ազգային քաղաքացիական միավորումը կենսաթոշակների 50% բարձրացման պահանջով ստորագրահավաք է սկսել, դեկտեմբերի 5-ին տեղի ունեցած ասուլիսին հայտարարել է միավորման համակարգող Ավետիք Չալաբյանը։
Նա տեղեկացրել է, որ ստորագրահավաքը մեկնարկել է դեկտեմբերի 1-ին և կշարունակվի առնվազն 3 ամիս։ Չալաբյանը նշել է, որ ստորագրահավաքի արդյունքները կառավարությանը կներկայացնեն հանրագրի տեսքով։
«Ստորագրահավաքներն իրականացնելու ենք մեր գրասենյակներում, ինչպես նաև շրջիկ խմբերի միջոցով։ Կենսաթոշակների խնդրով մտահոգ մեր քաղաքացիներին կոչ ենք անում միանալ ստորագրահավաքին, քանի որ մեկ ստորագրությունը հավելյալ կշիռ է խնդրի լուծման համար»,- հայտարարել է նա։
Չալաբյանը նշել է, որ համաձայն չեն իշխանությունների այն պնդումներին, թե բյուջեում հավելյալ միջոցներ չկան։ Նրա խոսքով՝ 2026-ի համար 300 մլրդ դրամ հավելյալ միջոց կա։
Վարչապետ Նիկոլ Փաշինյանն Ազգային ժողովում հայտարարել էր, որ կենսաթոշակի բարձրացման հարցը քննարկելուց հետո եկել է այն եզրակացության, որ այն 10 000 դրամով բարձրացնելու դեպքում թոշակառուները չեն իմանա, թե ինչպես ծախսել այդ գումարը։
Կարդացեք նաև՝
«Չի հերիքում», «Կարիքի մեջ ենք», «Թոշակից գոհ եմ». հարցում՝ թոշակը բարձրացնելու փոխարեն զբաղվածության ծրագրի կիրառման մասին
Թոշակների հետվճարն ու դրա ժամկետները կավելացվեն․ կառավարության որոշում
