Թուրքիան Ադրբեջանին կապող Կարս-Իգդիր-Արալըք-Դիլուջու երկաթուղային գծի հիմնարկեքի արարողությունը կկայանա օգոստոսի 22-ին, հայտնել է Թուրքիայի տրանսպորտի և ենթակառուցվածքների նախարար Աբդուլքադիր Ուրալօղլուն։
Ըստ թուրքական լրատվամիջոցների՝ նա նշել է, որ այսպես կոչված «Զանգեզուրի միջանցքի շահագործման հանձնման դեպքում Պեկինից մինչև Լոնդոն ձգվող արևելք-արևմուտք գիծը կգործի ավելի արդյունավետ»։
Նախարարը հավելել է, որ նախագծի համար ապահովվել է 2,4 մլրդ եվրո արտաքին ֆինանսավորում, իսկ 224 կիլոմետրանոց երկկողմանի գիծը կէլեկտրիֆիկացվի, և ճանապարհային նշաններ կտեղադրվեն: Նախատեսվում է, որ գիծը կունենա տարեկան 5,5 մլն ուղևոր և 15 մլն տոննա բեռ:
Մայիսին Ուրալօղլուն հայտարարել էր, որ «Զանգեզուրի միջանցքի» նախագիծը նախատեսվում է իրականացնել «առաջիկա 3-4 տարիների ընթացքում»։
Փորձագետները նշում են, որ այսպես կոչված «Զանգեզուրի միջանցքի» գործարկումը կարող է փոխել տարածաշրջանում տարանցիկ փոխադրումների հավասարակշռությունը։ Վրաստանը ավանդաբար եկամուտ է ստանում իր Բաթումի և Փոթի նավահանգիստներով բեռնափոխադրումների տարանցումից, ինչպես նաև Բաքու–Թբիլիսի–Կարս երկաթուղուց։ 2024 թվականին, օրինակ, Կուլևիի տերմինալը տեղափոխել է 2,5 մլն տոննա բեռ, որից 1,55 մլն տոննան բաժին է ընկել տարանցմանը։ Սակայն նոր երթուղին կարող է այդ հոսքերի մի մասը վերաուղղել՝ շրջանցելով վրացական տարածքը, նկատում են վրացական ԶԼՄ-ները:
