Fitch Ratings միջազգային վարկանիշային գործակալությունը Հայաստանի և Ադրբեջանի միջև ստորագրված շրջանակային համաձայնագիրը դրական քայլ է անվանել դեպի համապարփակ համաձայնագիր, որը կբերի տնտեսական աճի ու առևտրի խթանման։
«Տնտեսական աճի, կառավարության եկամուտների և առևտրի համար նյութական օգուտները կզգացվեն առնվազն մի քանի տարի»,- նշել է կազմակերպությունը։
Տարածած հայտարարության մեջ գործակալությունը նշել է, որ այն նվազեցնում է ռազմական գործողությունների վերսկսման ռիսկը, չնայած խոչընդոտներ դեռևս կան։
«Խաղաղության համաձայնագրի հասնելը, հավանաբար, անմիջապես չի ազդի որևէ երկրի վարկանիշի վրա, բայց կարող է նպաստել միջնաժամկետ վարկային դրական միտումներին, մասնավորապես՝ ընդլայնված առևտրի միջոցով, որը կարող է խթանել աճը, չնայած դա դժվար է քանակապես գնահատել»,- ասված է հայտարարության մեջ։
Գործակալությունը շեշտել է, որ հռչակագիրը համապատասխանում է սպասումներին, որ ռազմական հակամարտության վերադարձը քիչ հավանական է, բայց սա մնում է նախնական շրջանակ՝ առանց տարանցիկ միջանցքի կառուցման կամ պարտավորեցնող պայմանագիր կնքելու համաձայնեցված ժամկետների։
Օգոստոսի 8-ին Վաշինգտոնում Հայաստանի և Ադրբեջանի ղեկավարներն ԱՄՆ-ի միջնորդությամբ հռչակագիր էին ստորագրել, որով նաև նախատեսվում է ստեղծել TRIPP (Trump Route for International Peace and Prosperity) տրանսպորտային երթուղի: Կողմերը նաև նախաստորագրել էին խաղաղության համաձայնագրի նախագիծ, որն օգոստոսի 11-ին հրապարակվել էր ՀՀ ԱԳՆ-ի կողմից: Փաստաթղթի համաձայն՝ կողմերը միմյանց նկատմամբ տարածքային պահանջներ չունեն և հետագայում նման պահանջներ չեն առաջադրելու:
