Ազգային ժողովը մայիսի 29-ի նիստում երկրորդ ընթերցմամբ և ամբողջապես ընդունել է կառավարության հեղինակած «Կրիպտոակտիվների մասին» մայր օրենքի նախագիծը, ինչն առաջացրել է ոլորտի ներկայացուցիչների դժգոհությունը։ Նրանց կարծիքով՝ օրենքը, որով ՀՀ կենտրոնական բանկի կողմից կրիպտոակտիվներով մատուցվող ծառայությունների համար լիցենզավորման պահանջ է սահմանվում, կվնասի ոլորտին։
«Կրիպտոակտիվների մասին» մայր օրենքի նախագծի փաթեթը ներկայացնելով՝ ԿԲ նախագահի տեղակալ Արմեն Նուրբեկյանը նշել է, որ Հայաստանում այս ոլորտը կարգավորված չէ: Նրա խոսքով՝ օրենսդրական փաթեթով իրավական դաշտ է ստեղծվում, ինչը թույլ կտա կարգավորել ոլորտը։
«Օրենքը կրիպտոակտիվների ոլորտում հստակություն է մտցնելու ներդրողների ու սպառողների համար։ Մեր նպատակը հնարավորություններն ու ռիսկերը հավասարակշռելն է։ Նախագծով սահմանվում են կրիպտոակտիվներով մատուցվող այն 10 ծառայության տեսակները, որոնք լիցենզավորում են պահանջում։ Մենք հստակ լիցենզավորման գործընթաց ենք ունենալու։ ԿԲ-ի կողմից դաշտը վերահսկվելու և կարգավորվելու է»,- նշել է Նուրբեկյանը։
Նա ընդգծել է, որ նախագծի՝ առաջինից երկրորդ ընթերցում արված փոփոխությունը վերաբերում է կրիպտոակտիվներով ծառայություն մատուցելու դեպքում բանկերի համար պարտադիր լիցենզիա սահմանելու դրույթին։ Նուրբեկյանը մանրամասնել է, որ ի սկզբանե նախագծով սահմանվում էր, որ բանկերն առանց նոր լիզենզիա ստանալու, պարզապես լրացուցիչ թույլտվությամբ, կարողանալու էին կրիպտոակտիվներով ծառայություն մատուցել։
«Այսինքն՝ պետք չէր որևէ նոր ընկերություն բացել, ընդամենը լրացուցիչ թույլտվություն էին ստանալու ԿԲ-ից ու կարողանալու էին ծառայություն մատուցել։ Բայց առաջինից երկրորդ ընթերցման ընթացքում փոփոխություն ենք արել, ըստ որի՝ բանկերն իրենց լիցենզիայով չեն կարողանալու կրիպտոակտիվներով ծառայություն մատուցել, նրանք դրա համար պետք է նոր ընկերություն բացեն, նոր լիցենզիա ստանան»,- բացատրել է Նուրբեկյանը։
Web3 Հայաստան հիմնադրամը (WEB3 Armenia Foundation) ԱԺ-ի կողմից նախագիծն ընդունելուց հետո հայտարարել է, որ կրիպտո օրենսդրական փաթեթը լրջորեն վնասելու է ոլորտում գործող կազմակերպությունների և նորաստեղծ ստարտափների զարգացմանը։
«Չնայած բազմիցս բարձրացված մտահոգություններին, առաջարկություններին և երկխոսության փորձերին՝ օրենսդիրն անտեսեց ոլորտի մասնագետների ձայնը։ Web3 Հայաստան հիմնադրամը և համայնքը խորին հիասթափություն են հայտնում։ Սա մեկ քայլ հետ է երկրի տեխնոլոգիական առաջընթացի համար՝ այն դեպքում, երբ աշխարհի բազմաթիվ երկրներ ընտրում են բաց և համապարփակ մոտեցում՝ խթանելով նորարարությունը և գրավելով ներդրումներ»,- շեշտել են հիմնադրամից։
Web3 Հայաստանը նաև ընդգծել է, որ չի պատրաստվում հանձնվել՝ կոչ անելով միանալ իրեն և բարձրաձայնել մտահոգությունները։
«Համայնքը շարունակելու է իր պայքարը՝ ավելի արդար, ներառական և գերժամանակակից իրավական դաշտի համար, որը կնպաստի Հայաստանի՝ տարածաշրջանում Web3 առաջատար կենտրոններից մեկի վերածմանը։ Բոլոր շահագրգիռ կողմերին կոչ ենք անում միանալ համայնքին՝ բարձրաձայնելու այս հարցը, ցույց տալու ոլորտի իրական ներուժը և ապահովելու հավասար հնարավորություններ բոլորի համար»,- եզրափակել են հիմնադրամում։
Կրիպտոարժույթի ոլորտը կարգավորող օրինագծին կառավարությունը հավանություն էր տվել 2025-ի փետրվարին։
2024-ի հոկտեմբերին ԱԺ պետաիրավական հարցերի հանձնաժողովը երկրորդ ընթերցմամբ հավանություն էր տվել երկրում կիբերհանցագործության դեմ պայքարի մասին օրենքում կրիպտոարժույթների հետ կապված գործունեության վերահսկողության վերաբերյալ փոփոխություններին։ Մեկնաբանելով օրինագիծը՝ «Քաղաքացիական պայմանագիր» խմբակցության քարտուղար Արթուր Հովհաննիսյանն Armenia Today-ին ասել էր, որ կասկածելի գործարքներն իրականացվում են հենց կրիպտոարժույթներով։
