Աբխազիայի զբոսաշրջության նախարար Աստամուր Լոգուան Հայաստանի տուրիստական ոլորտի ներկայացուցիչների հետ քննարկել է երկու երկրների միջև զբոսաշրջային հոսքերի ավելացման հարցերը, գրել է Apsnypress.info-ն։
Լոգուան Հայաստանի տուրիստական ոլորտի ներկայացուցիչներ՝ «Կիվի թրեվլ» ընկերության սեփականատեր Մարիամ Մելքոնյանի և մենեջեր Սվետլանա Հովհաննիսյանի հետ հանդիպմանն ընդգծել է երկու ժողովուրդների միջև ազգակցական և բարեկամական կապերի կարևորությունը:
Նա նշել է, որ հայկական մշակույթին նվիրված ամենամյա «Համշեն» փառատոնը կարող է խթան հանդիսանալ Հայաստանից Աբխազիա զբոսաշրջիկների հոսքի ավելացման համար: Նախարարը պատմել է, որ Աբխազիայի բնակիչները հաճախ են այցելում Երևան, որը հայտնի է իր տեսարժան վայրերով, սպասարկմամբ և գաստրոնոմիայով:
Իր հերթին՝ Հայաստանի ներկայացուցիչները հաստատել են հայ զբոսաշրջիկների հետաքրքրությունն Աբխազիայի նկատմամբ: Մելքոնյանի խոսքով՝ Հայաստանից զբոսաշրջային հոսքի ավելացման հիմնական խոչընդոտներից մեկը վիզայի ստացման հետ կապված դժվարություններն են:
Լոգուան տեղեկացրել է, որ Զբոսաշրջության նախարարությունն արդեն իսկ աշխատում է այդ հարցի լուծման ուղղությամբ:
«Նամակով դիմել ենք նախագահ Բադրա Գունբային՝ առաջարկելով բացառություն անել Հայաստանի քաղաքացիների համար, ինչպես Բելառուսի և Ղազախստանի հետ համագործակցությունն է այս ոլորտում: Առաջարկում ենք Հայաստանի քաղաքացիներին թույլատրել առանց վիզայի մուտք գործել Աբխազիա երկու շաբաթ ժամկետով՝ զբոսաշրջային նպատակներով: Հուսով ենք՝ երկրի ղեկավարությունը կաջակցի այս նախաձեռնությանը, և դա խթան կհանդիսանա մեր ծրագրերի առավել ակտիվ իրականացմանը»,- ասել է Լոգուան:
