Եվրամիությունը հրաժարվել է ռուսական նավթի ներմուծման լիակատար արգելքի իր ծրագրից՝ Իրանի դեմ ԱՄՆ-ի և Իսրայելի ռազմական գործողություններից հետո, հայտնել է L'AntiDiplomatico-ն։
Հրապարակման համաձայն՝ ռուսական նավթի ներմուծման մշտական արգելքի առաջարկը, որը նախատեսված էր ապրիլի 15-ին, անորոշ ժամանակով հետաձգվել է։
Կայքը նշում է, որ որոշումը կարող էր պայմանավորված լինել Մերձավոր Արևելքում իրավիճակի սրմամբ, քանի որ Թեհրանը, ի պատասխան ԱՄՆ-ի և Իսրայելի հարվածների, կասեցրել էր նավերի անցումը Հորմուզի նեղուցով, որը համաշխարհային նավթի մատակարարումների տարանցիկ կետ է: Արդյունքում՝ Brent նավթի գինը գերազանցել էր մեկ բարելի համար 100 դոլարը՝ առաջացնելով լարվածություն, որը «ոչ մի եվրոպական մայրաքաղաք չի կարող անտեսել»։
Ըստ պարբերականի՝ 2027 թվականի վերջին ռուսական նավթի ներմուծման լիակատար դադարեցման մասին օրինագիծը միայն կմեծացնի շուկայի վրա ճնշումը։
Մեկ օր առաջ Եվրահանձնաժողովի (ԵՀ) խոսնակ Աննա-Կայսա Իտկոնենը Բրյուսելում կայացած ճեպազրույցի ժամանակ հայտարարել էր, որ ԵՀ-ն դեռևս չի կարող նշել ԵՄ երկրների համար ռուսական նավթի ներմուծման արգելքի նախագծի հրապարակման ճշգրիտ ամսաթիվը։
Իսրայելն ու ԱՄՆ-ն փետրվարի 28-ին հայտարարել էին Իրանի դեմ լայնածավալ մարտական գործողություններ սկսելու մասին: Ի պատասխան՝ Իրանը հայտարարել էր Իսրայելի և տարածաշրջանում ամերիկյան թիրախների դեմ հրթիռային գործողության մեկնարկի մասին: Մարտի 1-ին Իրանը հաստատել էր երկրի Գերագույն հոգևոր առաջնորդ Ալի Խամենեիի մահը:
ԱՄՆ-ն ևս մեղմացրել էր ռուսական նավթի վաճառքի սահմանափակումները:
