ԱՄՆ ֆինանսների նախարարությունը թույլատրել է մարտի 12-ից առաջ նավթ և նավթամթերքներով բեռնված ռուսական նավերին իրականացնել դրանց վաճառքը, հայտնում է «Ինտերֆաքս»-ը:
Համապատասխան փաստաթղթի համաձայն՝ թույլատրվում են ռուսական ծագման հում նավթի և նավթամթերքների վաճառքի, առաքման կամ բեռնաթափման համար անհրաժեշտ բոլոր գործարքները, եթե դրանք բեռնվել են նավի վրա մինչև նշված ամսաթիվը: Լիցենզիան ուժի մեջ է մինչև 2026 թվականի ապրիլի 11-ը:
Ռուսաստանի նախագահի հատուկ ներկայացուցիչ Կիրիլ Դմիտրիևը հայտարարել է, որ այս որոշումը նաև ենթադրում է տարանցման մեջ գտնվող մոտ 100 միլիոն բարել ռուսական նավթի նկատմամբ սահմանափակումների վերացում:
«ԱՄՆ-ն փաստացի ճանաչում է ակնհայտը. առանց ռուսական նավթի համաշխարհային էներգետիկ շուկան չի կարող կայուն մնալ»,- գրել է Դմիտրիևը Տելեգրամում:
Նրա խոսքով՝ աճող էներգետիկ ճգնաժամի ֆոնին ռուսական էներգակիրների նկատմամբ սահմանափակումների հետագա մեղմացումը գնալով ավելի հավանական է դառնում:
Մերձավոր Արևելքում պատերազմի ֆոնին վերլուծաբանները զգուշացնում են, որ հակամարտության հետագա սրումը կարող է հանգեցնել նավթի գների կտրուկ աճի և լուրջ ռիսկեր ստեղծել գլոբալ էներգետիկ անվտանգության համար: Reuters-ի փոխանցմամբ՝ համաշխարհային նավթի գները, սակայն, վերջերս կտրուկ նվազել են ԱՄՆ նախագահ Դոնալդ Թրամփի՝ տարածաշրջանում հակամարտության մոտալուտ ավարտի մասին հայտարարությունից հետո։
