Երևանում կանցկացվի հայ կոմպոզիտորական արվեստի 16-րդ փառատոնը, հայտնում է Հայաստանի պետական սիմֆոնիկ նվագախումբը։ Փառատոնը մեկնարկում է փետրվարի 8-ին և կավարտվի փետրվարի 24-ին։
Հայ կոմպոզիտորական արվեստի 16-րդ փառատոնը կմեկնարկի համաշխարհային երկու պրեմիերայով. փետրվարի 8-ին առաջին անգամ կհնչի ժամանակակից կոմպոզիտոր Վաչե Շարաֆյանի Թիվ 4 սինֆոնիան՝ «Շնորհալի, աղօթական», որը նվիրված է Սուրբ Ներսես Շնորհալի Ամենայն Հայոց Հայրապետի ննջման 850-ամյակին և Սուրբ Էջմիածնի Մայր Տաճարի վերաօծմանը: Բացման համերգին տեղի կունենա մեկ այլ ժամանակակից կոմպոզիտորի՝ Քրիստինա Առաքելյանի Դաշնամուրի կոնցերտի պրեմիերան։ Որպես մենակատար հանդես կգա հեղինակը՝ Քրիստինա Առաքելյանը։ Համերգի ընթացքում կհնչեն նաև հատվածներ Էդգար Հովհաննիսյանի «Մարմար» սյուիտից։ Համերգը կղեկավարի դիրիժոր Ջուն Սան Պարկը։
Փետրվարի 17-ին՝ ժամը 19:30-ին, Արամ Խաչատրյան համերգասրահում կայանալիք համերգը նվիրված է կոմպոզիտոր Գագիկ Հովունցի ծննդյան 95-ամյակին։ Երեկոյի ընթացքում կհնչեն Գագիկ Հովունցի, Արթուր Ահարոնյանի և Արփինե Կալինինայի ստեղծագործությունները։ Մենակատարները կլինեն դաշնակահար Ժան-Պոլ Գասպարյանը և սոպրանո Շուշիկ Պարսումեանը։ Համերգը կղեկավարի Ալեքսանդր Հումալան։
Փետրվարի 18-ին՝ ժամը 19:30-ին, Կոմիտասի թանգարան-ինստիտուտի համերգասրահում համերգով հանդես կգա Հայկական պղնձյա փողային կվինտետը։ Երեկոյի ընթացքում կհնչեն հայ կոմպոզիտորներ Ալեքսանդր Հարությունյանի, Արամ Խաչատրյանի, Կոնստանտին Պետրոսյանի, Պետրոս Շուժունյանի, Նուբար Ասլանյանի և Անդրանիկ Բերբերյանի ստեղծագործությունները։
Փետրվարի 24-ին՝ ժամը 19:30-ին, Արամ Խաչատրյան համերգասրահում տեղի կունենա Միշել Լեգրանի դաշնամուրային կոնցերտի պրեմիերան՝ ճապոնացի դաշնակահար Ռիեկո Ցուչիդայի և Հայաստանի պետական սիմֆոնիկ նվագախմբի կատարմամբ։ Երեկոյի ընթացքում կհնչի նաև անվանի կոմպոզիտոր Վարդան Աճեմյանի 4-րդ սիմֆոնիան։ Երեկոյի դիրիժորն է Ջանլուկա Մարչիանոն։
Փառատոնի շրջանակներում 6 և ավելի տարեկան երեխաներին թույլատրվում է ներկա գտնվել բոլոր համերգներին: Տոմսերի արժեքը տատանվում է 2000-10 000 դրամի սահմաններում։
Ինչպես նշում է կազմակերպիչը՝ Հայաստանի պետական սիմֆոնիկ նվագախումբը, փառատոնի նպատակն է լայն լսարանի շրջանում տարածել հայ դասականների և ժամանակակից կոմպոզիտորների ստեղծագործությունները, ինչպես նաև ձայնագրել, նկարահանել, թվայնացնել և պահպանել հայ կոմպոզիտորների սիմֆոնիկ և կամերային ստեղծագործությունների պարտիտուրները։
Հայ կոմպոզիտորական արվեստի փառատոնը, որն ստեղծվել է 2010 թվականին Հայաստանի պետական սիմֆոնիկ նվագախմբի գեղարվեստական ղեկավար և գլխավոր դիրիժոր Սերգեյ Սմբատյանի նախաձեռնությամբ և ամեն տարի նվիրված է հայ լեգենդար կոմպոզիտորներից մեկին, կոչված է պահպանել հայ դասական կոմպոզիտորական դպրոցի ավանդույթները՝ միաժամանակ նպաստելով հայ կոմպոզիտորների ճանաչմանը։
