«Նոր Ալիք» մրցույթի 2019 թվականի հայաստանյան մասնակիցն է Տյոմը։ Armenia Today-ը զրուցել է «Նոր Ալիք 2019»-ի հայաստանյան պատվիրակի հետ:
Տյոմը նախ կիսվեց իր տպավորություններով.
«Տպավորություններս հիանալի են։ Այդ բեմում ելույթ ունենալն իրականում անբացատրելի զգացողություն է և միաժամանակ պատասխանատու։ Երեկ ես շատ հաջող ելույթ եմ ունեցել, շատ շնորհակալ եմ այն մարդկանց, ովքեր մեզ հետ աշխատեցին։ Հատուկ շնորհակալություն մեր գլխավոր ռեժիսոր Ալեքսանդր Ռևզինին»:
Տյոմը մեզ պատմեց նաև կուլիսային հանդիպումների ու երկրպագուների հրաշալի արձագանքի մասին. «Հանդիսատեսի արձագանքն աննկարագրելի էր, երբ համերգն ավարտվեց և մենք դուրս եկանք, ինձ հետ մի ամբողջ մարդկանց բազմություն էր ցանկանում նկարվել: Ես զգացի, որ արժանացել եմ հանդիսատեսի համակրանքին, ինչը շատ կարևոր է»:
Նշենք,որ այս տարի մրցույթի ձևաչափում ևս փոփոխություններ են եղել, սակայն, մեր մասնակցի խոսքով՝ ձևաչափային փոփոխությունն իրականում բավականին հետաքրքիր է, քանի որ այս տարի մասնակիցները մրցութային առաջինը օրը պետք է ներկայացնեն մեկ երգ Ալլա Պուգաչովայի երգացանկից, իսկ հաջորդ օրերին երգ, որը գրվել է հատուկ տվյալ մասնակցի համար։
Նշենք, որ մեր մասնակիցը մրցութային 2-րդ օրը՝ օգոստոսի 27-ին, կներկայացնի Գոռ Սուջյանի ու Աննա Հարությունյանի երգը: Երգը կոչվում է Let me feel you։
Armenia Today-ը նաև հետաքրքրվել է, թե երգիչը ֆինանսական աջակցություն ստացել է մրցույթին մասնակցելու համար. հայաստանյան մասնակիցը մեկնաբանում է․
«ՀՀ ԿԳՄՍ նախարարությունից, առհասարակ պետությունից որևէ ֆինանսական աջակցություն չեմ ստացել, միայն երգերի գործիքավորման և ստեղծման համար ֆինանասավորել է ինձ Vivaro ընկերությունը, որից շատ շնորհակալ եմ, որովհետև, եթե չֆինանասավորեր, գուցե ես չկարողանայի մասնակցել մրցույթին, որովհետև ՀՀ ԿԳՄՍ նախարարությունը հրաժարվեց ֆինանսավորել ինձ»:
Զրույցի վերջում մեր մասնակիցն ասաց, որ շատ նոր ծրագրեր կան մրցույթից հետո: Մրցույթն իրեն շատ բան է տվել և առաջին հերթին լավ ընկերներ.«Այստեղ ես ունեմ ընկերներ, ովքեր աստղեր են և հույս ունեմ, որ մեր ընկերությունը կշարունակվի։ Նրանց շարքերում կան ավագ սերնդի ներկայացուցիչներ, ովքեր իրենց խորհուրդներով օգնում են մեզ։»
Մենք մեր մասնակցին հաջողություն ենք մաղթում մրցույթի հետագա փուլերում և խոստանում ներկայացնել մրցույթի ընթացքը:
Հիշեցնենք, որ մրցույթն առաջին անգամ անցկացվել է Յուրմալայում՝ 2002 թվականին: Մրցույթի ստեղծման գաղափարի հեղինակներն են Իգոր Կրուտոյը և Ռայմոնդ Պաուլսը:
Հայաստանը մրցույթին առաջին անգամ մասնակցել է 2003 թվականին: Նախորդ տարի Հայաստանը ներկայացրել է Գևորգ Հարությունյանը: Տարբեր տարիներին Հայաստանը ներկայացրել են Էմմին,Ռազմիկ Ամյանը, Մհերը, Սուրեն Առուստամյանը, Մաշա Մնջոյանը, իսկ 2010 թվականին Սոնա Շահգելդյանը գրավել է առաջին պատվավոր հորիզոնականը:
