«Ուժեղ Հայաստան» դաշինքը զեկույց է պատրաստում ընտրության ժամանակ և դրան նախորդող շրջանում արձանագրված խախտումների վերաբերյալ։ Այդ մասին հայտնել է դաշինքի պատգամավորի թեկնածու, սահմանադրագետ Գոհար Մելոյանը։ Նրա մամուլի ասուլիսի ուղիղ հեռարձակումն՝ Armenia Today-ի յութուբյան ալիքում։
Մելոյանը հայտարարել է, որ խորհրդարանական ընտրությունների ընթացքում խախտվել են ընտրական գործընթացի հիմնարար սկզբունքները, իսկ արձանագրված փաստերով, որոնք կմեկտեղեն զեկույցում, պատրաստվում են հանցագործության մասին հաղորդումներ ներկայացնել իրավապահ մարմիններին։
Նրա խոսքով՝ դաշինքի թիմը հատուկ ստեղծված թեժ գծի միջոցով հազարավոր ահազանգեր է ստացել խախտումների մասին և այժմ աշխատում է դրանց ստուգման ուղղությամբ։
Մելոյանը հայտարարել է, որ հաղորդումների մի մասը վերաբերում է վարչական ռեսուրսի կիրառմանը։ Ըստ նրա՝ պետական ծառայության աշխատակիցներին ստիպել էին գնալ, իշխանության օգտին քվեարկել և քվեաթերթիկը լուսանկարել կամ մեր քվեաթերթիկը դուրս բերել՝ ի ապացույց, որ տվյալ անձինք իրենց ուժին չեն քվեարկել։
Նա, հղում անելով ստացած ահազանգերին, հայտնել է, որ որոշ մարդիկ նախապես իշխող «Քաղաքացիական պայմանգրի» 16 համարի քվեաթերթիկը ծոցագրպանում մտել են ընտրատեղամաս։ Միևնույն ժամանակ, նրա խոսքով՝ մի շարք տեղամասերում «Ուժեղ Հայաստան» դաշինքի երրորդ համարի քվեաթերթիկները կա՛մ վնասված են հայտնաբերել, կա՛մ բացակայել են սեղաններից, կա՛մ ընդհանրապես չեն տրամադրվել, իսկ որոշ տեղամասերում արձանագրություններ են կազմվել՝ առանց այդ հանգամանքն արտացոլելու։
Մելոյանը պնդել է, որ որոշ հանձնաժողովներում արձանագրությունները լրացվել են մատիտով, ինչը, նրա գնահատմամբ, հնարավորություն է ստեղծում ջնջել ու փոխել տվյաները։ Նա նաև ուշադրություն է հրավիրել անվավեր քվեաթերթիկների թվի աճին՝ նշելով, որ 2018 թվականին դրանց թիվը կազմել է 4706, 2021-ին՝ 4593, իսկ այս ընտրություններում՝ 17 097։ Այդ կապակցությամբ դաշինքը պահանջել է վերահաշվել բոլոր անվավեր քվեաթերթիկները։
Դաշինքի ներկայացուցչի խոսքով՝ քաղաքացիները խնդիրների առաջ են կանգնել նաև ցուցակների և ընտրատեղամասերի հետ կապված։ Ըստ նրա՝ քաղաքացիները նախապես ստուգել են իրենց տվյալները, սակայն քվեարկության օրը պարզել, որ դուրս են մնացել ցուցակներից կամ փոխվել են իրենց ընտրատեղամասերը, իսկ որոշ դեպքերում՝ անձնագրային ծառայությունները հրաժարվել են անհրաժեշտ տեղեկանքներ (ձևեր) տրամադրել։ Մելոյանը հայտնել է նաև, որ քաղաքացիներին չեն ծանուցել փոփոխված ընտրատեղամասերի մասին։
Բացի այդ, Մելոյանը բարձրաձայնել է հարյուրավոր հասցեների մասին, որտեղ մեծ թվով քաղաքացիներ են հաշվառված։ Դաշինքում հայտնաբերել են 846 հասցե, որոնցում 20-ից ավելի մարդ է հաշվառված, իսկ առանձին դեպքերում մեկ հասցեի վրա ընդհուպ մինչև 303, 185 և 174 մարդ է գրանցված։ Նա նշել է, որ ՆԳՆ-ն և Միգրացիայի ու քաղաքացիության ծառայությունը ընտրացուցակների «խառնաշփոթի» վերաբերյալ պատշաճ բացատրություն չեն տվել։
Մեկնաբանելով «Ուժեղ Հայաստանի» համակիրների ձերբակալություններն ու կալանքները՝ Մելոյանը հայտարարել է, որ այդ գործողություններն ուղղված էին վախի մթնոլորտ ձևավորելուն և դաշինքի ընտրական վերահսկողության համակարգը թուլացնելուն։ Մելոյանը հայտարարել է, որ բերման են ենթարկել նույնիսկ տարեց կանանց՝ բացառապես ահաբեկելու նպատակով։ Նա նաև նշել է, որ դաշինքի վստահված անձինք պարբերաբար ձերբակալվել են, ինչի հետևանքով ընտրություններին ընդառաջ՝ ստիպված մի քանի անգամ վերապատրաստել են նոր ներկայացուցիչների։
Մելոյանը հայտնել է, որ դաշինքն ստուգել է 900-ից ավելի ընտրատեղամաս և անհրաժեշտ է համարում Երևանում համատարած վերահաշվարկ իրականացնել։ Նրա խոսքով՝ վերահաշվարկների արդյունքներով «Քաղաքացիական պայմանագիրը» ձայներ է կորցնում, ուստի մինչև մանդատներին հասնելը դրա հիմքում գտնվող թվերը պետք է ճշգրտվեն։
Նա ներկայացրել է առանձին տեղամասերում ձայների վերահաշվարկի արդյունքների վերաբերյալ աղյուսակ, որտեղ, օրինակ, ՔՊ-ին սկզբնապես տրված ձայները էապես նվազել են։ Օրինակ՝ ըստ Մելոյանի հրապարակած արդյունքի, տեղամասերից մեկում ՔՊ-ն փաստացի 0 ձայն է ստացել, բայց ԿԸՀ-ի տվյալում նշվել է 570 ձայն։ Ընդհանուր առմամբ, ՔՊ-ի՝ 5-ից մինչև ավելի քան 600 ձայներ վերահաշվարկի արդյունքում նվազել են՝ հասնելով մինչև 1 ձայնի։
Դաշինքը նաև խախտումներ է արձանագրել Գյումրիում և առանձին գյուղերում, որտեղ, Մելոյանի փոխանցմամբ, իշխանության ներկայացուցիչները կամ գյուղապետերն ուղղորդել են ընտրողներին, բղավել ու քաշքշել նրանց։ Ըստ նրա տեղեկությունների՝ տվյալներ են ստացվել նաև տոտալիզատորների հաշիվների լիցքավորման միջոցով ընտրողներին կաշառելու փորձերի մասին։
Մելոյանը նաև հայտարարել է մատնահետքի նույնականացման սարքերի աշխատանքի խափանումների, չկապարակնքված քվեատուփերի, տեսախցիկների տեսադաշտից դուրս տեղափոխված արկղերի, ինչպես նաև քվեախցիկներ մուտք գործելու դեպքերի մասին։
Խոսելով մանդատների մասին՝ Մելոյանը հայտարարել է, որ «Ուժեղ Հայաստան» կուսակցությունը մանդատների վերաբերյալ քաղաքական որոշում դեռևս չունի։
«Մենք ո՛չ քաղաքական որոշում ունենք, ո՛չ էլ համապարփակ քաղաքական քննարկումներ ենք իրականացրել: Որոշումներ ունենալու համար պետք է քվեարկության ամփոփ արդյունքները լինեն»,- ասել է նա։
Armenia Today-ի հարցին ի պատասխան՝ Մելոյանը հավելել է, որ դաշինքի դիրքորոշումը կհստակեցվի և վերջնական պատկեր կլինի, երբ պատրաստ լինեն վերահաշվարկի արդյունքները։
«Վերջնական արդյունք կունենանք բոլոր 2005 ընտրատեղամի տվյալները վերլուծելուց հետո»,- ասել է նա՝ նշելով, որ դեռ շարունակում են վերլուծել արդյունքներն ու գույքագրել խախտումների մասին ահազանգերը։
Հունիսի 7-ին ՀՀ-ում անցկացվել էին Ազգային ժողովի ընտրություններ, որին մասնակցել էր 18 քաղաքական ուժ՝ 16 կուսակցություն և 2 դաշինք։ ԿԸՀ նախնական տվյալներով՝ 2 503 976 ընտրողից մասնակցել էր 1 477 736-ը (58,94%)։ Նախնական տվյալներով՝ անցողիկ շեմը հաղթահարել էր քաղաքական երեք ուժ՝ «Քաղաքացիական պայմանագիրը» (49,825%), «Ուժեղ Հայաստան» դաշինքը (23,281%) և «Հայաստան» դաշինքը (9,934%)։
«Բարգավաճ Հայաստան» կուսակցությունը, որը նախնական արդյունքով չի հաղթահարել անցողիկ 4%-ի շեմը, վերահաշվարկ էր պահանջել։ Հունիսի 9-ին շուրջ 50 ընտրատեղամասում վերահաշվարկի դիմում էր ներկայացրել նաև «Ուժեղ Հայաստանը»։
Ընտրությունների վերջնական արդյունքը կհրապարակվի հունիսի 14-ին՝ ինքնաշխատ եղանակով վերահաշվարկներից հետո։
«Ուժեղ Հայաստանը» հայտարարել էր, որ ԿԸՀ տվյալները չեն արտացոլում ընտրությունների իրական արդյունքները։ Ընդդիմությունը վարչապետ Նիկոլ Փաշինյանին մեղադրել էր իշխանության յուրացման փորձի և ԿԸՀ-ին ճնշելու մեջ։
Կարդացեք նաև՝
Ի՞նչ խախտումներ են արձանագրվել ընտրատեղամասերում
Մեր թիմակիցներից 75-ը կալանավորվել է, ընդհանուր՝ 700-ից ավելի մարդ. Կարապետյան
