Երևանի պետական համալսարանի ուսումնական գծով պրոռեկտոր Էլինա Ասրիյան հերքել է «Տավուշը հանուն հայրենիքի» շարժման ակցիաներին մասնակցելու համար ուսանողների նկատմամբ ճնշումներ գործադրելու մասին լուրերը:
Նա մոտեցել է շարժումը գլխավորող, Հայ առաքելական եկեղեցու Տավուշի թեմի առաջնորդ Բագրատ Սրբազանին, որը երթով հասել էր ԵՊՀ։ Սրբազանն ասել է, որ մայիսի 13-ին ուսանողության նկատմամբ ճնշումների մասին ահազանգեր են ստացել, ինչի վերաբերյալ երեկ հայտարարել էր Սուրբ Աննա եկեղեցու բակում՝ հավաքի ժամանակ։ Նա մեջբերել էր մամուլում հրապարակված այն տեղեկությունները, ըստ որի՝ Ասրիյանը մայիսի 13-ին ժողով է հրավիրել դեկանների հետ և հանձնարարել նրանց անպայման արձանագրել բոլոր ուսանողների բացակաները և նկատողություն հայտարարել։
«Երեկ որևէ դեկանի հետ որևէ հանդիպում տեղի չի ունեցել։ Այստեղ կան դեկաններ, որոնք կարող են դա հաստատել։ Հետևապես՝ որևէ նման հայտարարություն չի կարող լինել։ ԵՊՀ-ում յուրաքանչյուր ուսանողի իրավունք պաշտպանված է»,- ասաց պրոռեկտորը։
Մայիսի 4-ին սահմանազատման գործընթացի դեմ ձևավորված «Տավուշը հանուն հայրենիքի» շարժումը երթ էր սկսել դեպի Երևան, ուր հասել էին մայիսի 9-ին և նույն օրը հանրահավաք անցկացրել՝ հայտարարելով, որ պատրաստվում են ԱԺ-ում վարչապետ Նիկոլ Փաշինյանին անվստահության գործընթաց սկսել։ Շարժումը գլխավորող, Հայ առաքելական եկեղեցու Տավուշի թեմի առաջնորդ Բագրատ Սրբազանը հանրահավաքի ժամանակ կոչ էր արել մայիսի 13-ի առավոտից անհնազանդության ակցիաներ սկսել։
ՀՀ ԱԳՆ-ն ապրիլի 19-ին հայտարարել էր, որ Հայաստանն ու Ադրբեջանը պայմանավորվել են սահմանազատման գործընթացն սկսել Տավուշի մարզից, ինչից հետո Տավուշի սահմանամերձ գյուղերի բնակիչները բողոքի ակցիաներ էին սկսել։ Ակցիաների պատճառ էր դարձել նաև վարչապետի աշխատակազմի՝ ավելի ուշ արված հայտարարությունը, ըստ որի սահմանազատումից հետո Զինված ուժերը նշված հատվածների շրջանում իրենց տեղը կզիջեն սահմանապահ զորքերին։ Ապրիլի 19-ից մեկնարկած ակցիաները հաջորդող օրերին սկսվել են նաև ՀՀ այլ մարզերում և շարունակվում են մինչ օրս։
