Վարչապետ Նիկոլ Փաշինյանը կառավարության նիստի ընթացքում անդրադարձլ է ճանապարհների սպասարկմանը Հայաստանում և ուշադրություն է հրավիրել ճանապարհային նշանների անմխիթար վիճակի վրա։ Որպես օրինակ նա բերել է 17-րդ դարի Խոր Վիրապ վանական համալիրը և հայտարարել, որ Վանքի ցուցանակը չի փոխվել Հայկական ԽՍՀ ժամանակներից ի վեր, չնայած համալիրը զբոսաշրջային սեզոնի ամենասիրված վայրերից մեկն է։
«Օրինակ Խոր Վիրապը ամենահայտնի վայրերից մեկն է, պարոն մարզպետ, նախարար դուք էլ մի հատ Խոր Վիրապի ցուցանակը խնդրում եմ նայեք, ես երաշխավորում եմ, որ առնվազն իմ տարիքի է այդ ցուցանակը»,-ասել է նա:
Ճանապարհային փոսերի մասին խոսելով Փաշինյանը նշել է, որ Իջևան Դիլիջան ճանապարհին այնպիսի կիլոմետր չկա որի վրա փոս չկա: «ով է զբաղվելու դրանով, կամ ինչու երկրի վարչապետը այս թեմային պետք է անդրադարձ ունենա, սա նշանակում է, որ ինչ-որ մարդիկ իրենց աշխատանքը չեն կատարում ընդհանրապես»,- նշել է նա և պահանջել այդ մարդկանց անուն ազգանունները:
Նա նաև նկատել է, որ ճանապարհային նշաններ կան, որ 70 ական թվականներից այն կողմից չի փոխվել, ընդհանուր առմամբ խայտառակ վատ գնահատելով ճանապարհների սպասարկման որակը: Փաշինյանը կոչ է արել պաշտոնյաներին ավելի շատ ժամանակ անցկացնել գերատեսչությունների պատերից դուրս, որպեսզի «կյանքը տեսնեն կաբինետների, կամ ավտոմեքենաների ապակու մյուս կողմից»:
«Ես նույնիսկ համաձայն եմ աշխատանքային օրը կառավարության անդամները որոշեն, որ աշխատում են կաբինետից դուրս, ոչ պաշտոնական հագուստով և փորձեն կյանքը տեսնել այն կողմից՝ կաբինետների, կամ ավտոմեքենաների ապակու մյուս կողմից տեսնեն»,- ասել է նա:
