ՀՀ պաշտպանության նախկին նախարար Դավիթ Տոնոյանին թույլ չեն տվել ծանոթանալ 44-օրյա պատերազմի հանգամանքներն ուսումնասիրող քննիչ հանձնաժողովի զեկույցին, հայտարարել է Տոնոյանը։
Վերջինս նաև հայտնել է, որ իրեն չեն թույլատրել ծանոթանալ իր մասնակցությամբ նիստերի արձանագրություններին։
Պաշտպանության նախկին նախարարը նշել է, որ ԱԺ նախագահ Ալեն Սիմոնյանին հուլիսի 15-ին և հոկտեմբերի 28-ին ուղղված իր դիմումների պատասխանով իրեն տեղեկացվել է՝ հանձնաժողովի խորհրդարան ներկայացրած զեկույցն «Ազգային ժողովի կանոնակարգ» սահմանադրական օրենքի 25-րդ հոդվածով նախատեսված զեկույցի իրավական կարգավիճակ չունի։ Այդ պատճառով, ըստ Տոնոյանի, չեն կարող կիրառվել նույն օրենքի 22-րդ հոդվածի 2-րդ մասի 1-ին և 2-րդ կետերը, որոնք նախատեսում են նման փաստաթղթերին ծանոթանալու իրավունք։
Տոնոյանն ընդգծել է՝ այս պատասխանն ստացել է նոյեմբերի 13-ին՝ ԱԺ աշխատակազմի ղեկավար-գլխավոր քարտուղարի կողմից։ Նյութերին ու զեկույցին չծանոթանալու մասին պարզաբանում ստանալուց հետո ռազմական գերատեսչության նախկին ղեկավարը դիմել է իր փաստաբանական խմբին, ապա նոյեմբերի 24-ին կրկին դիմել է ԱԺ նախագահին՝ խնդրելով թույլատրել ծանոթանալ քննիչ հանձնաժողովի կազմած փաստաթղթին։
Տոնոյանը հավելել է, որ անհրաժեշտության դեպքում պատրաստ է հրապարակել ինչպես փաստաբանական խմբի պարզաբանումը, այնպես էլ ԱԺ աշխատակազմի հետ նամակագրությունը։
2024 թվականի սեպտեմբերին հանձնաժողովի նախագահ Անդրանիկ Քոչարյանը հայտնել էր, որ 44-օրյա պատերազմի հանգամանքների վերաբերյալ եզրակացությունը պատրաստ է։ Նա նշել էր, որ զեկույցում ներկայացված հայկական կողմի պարտության պատճառները տարասեռ են և բազմաշերտ: Հաշվետվությունն ԱԺ նախագահին ուղարկվել էր միայն մեկ տարի անց՝ 2025 թվականի սեպտեմբերին, թեև հանձնաժողովի լիազորություններն ավարտվել էին 2023 թվականին։
Հոկտեմբերի 1-ին Սիմոնյանը հատարարել էր, որ ժամկետները խախտելու հիմնավորմամբ զեկույցն ԱԺ լիագումար նիստերում ներառելու իրավական հիմքեր չկան, բայց այն հրապարակվելու է։ Հոկտեմբերի 6-ին ԱԺ-ից Armenia Today-ին տեղեկացրել էին, որ զեկույցն ԱԺ արխիվ ուղարկելու որոշում է կայացվել։
