ԱՄՆ նախագահ Դոնալդ Թրամփի վարչակազմը պատրաստվում է կրկին հարցաքննել որոշ փախստականների, որոնք ԱՄՆ էին եկել նախկին նախագահ Ջո Բայդենի պաշտոնավարման ընթացքում, հայտնում է CNN-ը:
Փախստականները պետք է ապացուցեն, որ հալածանքի են ենթարկվել կամ կանգնած են դրա վտանգի առջև իրենց երկրում և անցնեն խիստ ստուգում։ Թրամփի պաշտոնյաները քննադատել են ընդունելության այս ծրագիրը՝ պնդելով, որ նախորդ վարչակազմը բավարար կերպով չի ստուգել ԱՄՆ մուտք գործած անձանց։
Թրամփը պաշտոնավարման սկզբից գրեթե ամբողջությամբ դադարեցրել է փախստականների ընդունումը՝ բացառությամբ նվազ շրջանակի, այդ թվում՝ սպիտակ հարավաֆրիկացիների։
Հուշագրի համաձայն՝ ԱՄՆ Քաղաքացիության և ներգաղթի ծառայությունը պետք է իրականացնի վերանայման և կրկնակի հարցաքննության գործընթաց։ Փաստաթուղթը, որը թվագրված է նոյեմբերի 21-ով, հիմնավորում է այս քայլը «գործնական անհրաժեշտությամբ»՝ երաշխավորելու, որ փախստականներն ազգային կամ հանրային անվտանգությանը վտանգ չեն ներկայացնում։
2021-2025թթ․ ընթացքում ԱՄՆ է ընդունվել մոտ 235 000 փախստական։
