Թուրքիան այս պահին չի նախատեսում որևէ կապ կամ շփում հաստատել Իսրայելի ներկայիս կառավարության՝ վարչապետ Բենիամին Նեթանյահուի գլխավորությամբ գործող վարչակազմի հետ, ՏԱՍՍ-ի փոխանցմամբ՝ գրում են թուրքական լրատվամիջոցները։
Թերթի հրապարակման համաձայն՝ Թուրքիայի իշխանությունների համար Իսրայելում նոր կառավարության ձևավորման դեպքում որոշիչ կլինեն այդ կառավարության գաղափարախոսությունը և վարած քաղաքականությունը։
Անդրադարձ է կատարվել նաև ԱՄՆ դեսպան Թոմ Բարաքի՝ վերջերս արված հայտարարությանը, ըստ որի՝ «Թուրքիան և Իսրայելը չեն պատերազմելու միմյանց դեմ»։ Բարաքը հավելել էր, որ հնարավոր է երկու երկրների տարածաշրջանային համագործակցությունը՝ Կասպից ծովից մինչև Միջերկրական ծով ընկած գոտում։
Թուրքական աղբյուրը նշում է, որ ամերիկացի ներկայացուցիչները Բարաքի հայտարարությունները չեն դիտարկում որպես փաստի արձանագրում։ Նրանց կարծիքով՝ Վաշինգտոնը ձգտում է թույլ չտալ հակամարտություն երկու երկրրի միջև և նպատակ ունի հետագա տարիներին կապեր հաստատել Իսրայելի նոր կառավարության հետ։
Ըստ թուրք վերլուծաբան Հանդե Ֆըրաթի՝ Բարաքի՝ Կասպից ծովից մինչև Միջերկրական ծով համագործակցելու մասին խոսքերը կարող են մատնանշել էներգետիկ և առևտրային նոր միջանցքի ձևավորման գաղափարը, որը միավորելու է Ադրբեջանը, Թուրքիան և Իսրայելը։
Թուրքիայի նախագահ Ռեջեփ Թայիփ Էրդողանը բազմիցս մեղադրել է Իսրայելին Գազայի հատվածում ռազմական հանցագործություններ և ցեղասպանություն գործելու համար, իսկ Նեթանյահուին համեմատել է Ադոլֆ Հիտլերի հետ։
Թուրքիան 2024 թվականի մայիսից դադարեցրել էր առևտրային հարաբերություններն Իսրայելի հետ։ Իսրայելի դրոշի տակ գործող կամ նրան պատկանող և կապակցված նավերին արգելվել էր մուտք գործել թուրքական նավահանգիստներ։
