Վերջին տասնամյակների ընթացքում առաջին անգամ ԱՄՆ նախագահն Ազգային գվարդիան գործի է դնում՝ առանց նահանգի խնդրանքի կամ համաձայնության, տեղեկացնում է CNN-ը:
Նախագահ Դոնալդ Թրամփի հրամանով շուրջ 300 ազգային գվարդիացիներ հունիսի 8-ին տեղակայվել են Լոս Անջելեսի տարածքում՝ դաշնային անձնակազմի և գույքի պաշտպանությունն ապահովելու համար։ Բացի այդ, պատրաստ են տեղակայել նաև 500 ծովային հետևակայիններ։
Ցուցարարներն այստեղ հրկիզել են առնվազն երկու ինքնավար մեքենա։ Լոս Անջելեսի կենտրոնական շրջանն ամբողջությամբ հայտարարվել է անօրինական հավաքի գոտի։ Լոս Անջելեսի կենտրոնական շրջանում իրավապահները հունիսի 8-ի ակցիայի ժամանակ պայթուցիկ լուսային նռնակներ և արցունքաբեր գազ են կիրառել՝ մարդկանց ցրելու համար:
Կալիֆոռնիայի նահանգապետ Գեվին Նյուսոմը հայտարարել է, որ նահանգը դատական հայց է ներկայացնելու Թրամփի վարչակազմի դեմ՝ Ազգային գվարդիայի տեղակայման կապակցությամբ՝ այն անվանելով սադրիչ քայլ։ Նյուսոմն ու Լոս Անջելեսի քաղաքապետ Կարեն Բասը կոչ են արել դադարեցնել դաշնային զորքերի ներկայությունը։
Նահանգներում արդեն երրորդ օրն անընդմեջ բախումներ են իրավապահների և ցուցարարների միջև: Մայիսի 30-ին ԱՄՆ Գերագույն դատարանը Թրամփին թույլատրել էր արտաքսել 500 000 ներգաղթյալի։ Հայաստանի շուրջ 2808 քաղաքացի երկրում ապօրինի ներգաղթյալների դեմ Թրամփի քաղաքականության շրջանակներում կարտաքսվի ԱՄՆ-ից։ 2024 թվականի նոյեմբերի 24-ի դրությամբ՝ ԱՄՆ-ում ավելի քան 1,4 միլիոն ոչ ռեզիդենտ անձ էր հաշվառվել։ Այս ցուցակը գլխավորում են Մեքսիկան և Սալվադորը՝ համապատասխանաբար ավելի քան 252 000 և 203 000 դեպքերով:
