Հնդկաստանի Cox & Kings տուրիստական գործակալությունը որոշել է ժամանակավորապես դադարեցնել բոլոր նոր տուր փաթեթների առաջարկը դեպի Ադրբեջան, Թուրքիա և Ուզբեկստան՝ Պակիստանի հետ հակամարտության սրման ֆոնին, հաղորդում է Hindustan Times-ը:
Ընկերության տնօրեն Կարան Ագարվալի խոսքով՝ որոշումն ընդունվել է «վերջին իրադարձությունների լույսի ներքո»:
«Այս որոշումը թելադրված է մեր հանձնառությամբ՝ պահպանելու այն սկզբունքները, որոնք մեծ նշանակություն ունեն մեր և մեր երկրի ժողովրդի համար»,- ասել է նա:
Ագարվալը հնդիկ զբոսաշրջիկներին կոչ է արել «խոհեմություն ցուցաբերել և խուսափել այդ ուղղություններով ցանկացած ոչ էական ուղևորություններից, քանի դեռ աշխարհաքաղաքական իրադրության մեջ հստակություն չկա»:
Պարբերականը նշում է, որ ավելի վաղ առցանց ամրագրման մի քանի հարթակ նույնպես դադարեցրել էր դեպի Ադրբեջան և Թուրքիա ճանապարհորդության առաջարկների տրամադրումը:
Մայիսի 7-ին Թուրքիայի նախագահ Ռեջեփ Թայիփ Էրդողանը Պակիստանի վարչապետ Շահբազ Շարիֆի հետ հեռախոսազրույցում «Թուրքիայի համերաշխությունն էր հայտնել Պակիստանին»: Մայիսի 8-ին Ադրբեջանի ԱԳ նախարար Ջեյհուն Բայրամովը պակիստանցի գործընկերոջ հետ հեռախոսազրույցում նույնպես «համերաշխություն էր հայտնել պակիստանցի ժողովրդին՝ դատապարտելով Հնդկաստանի կողմից ռազմական հարձակումները»:
Երկու հարևան պետությունների միջև լարվածությունը կտրուկ աճել է Հնդկաստանի Փահալգամ նահանգում ապրիլի 23-ի զինված հարձակումից հետո, որի հետևանքով կար 26 զոհ: Մայիսի 7-ին Հնդկաստանը հայտարարել է, որ հրթիռային հարվածներ է հասցրել Պակիստանի կողմից վերահսկվող տարածքներում գտնվող ինը թիրախների:
