Բելառուսի նախագահ Ալեքսանդր Լուկաշենկոն աշխատանքից ազատել է Հայաստանում Բելառուսի դեսպան Ալեքսանդր Կոնյուկին, հայտնում է ԲԵԼՏԱ-ն։
Կոնյուկը Հայաստանում Բելառուսի դեսպան էր նշանակվել 2020 թվականի դեկտեմբերին։ Նրա պաշտոնավարման ընթացքում՝ 2024 թվականի հունիսին, տեղի էր ունեցել Երևանի և Մինսկի միջև հարաբերություններում ճգնաժամը։
ՀԱՊԿ-ում և ԵԱՏՄ դաշնակից երկու երկրների հարաբերությունները արդեն գրեթե 10 ամիս լարված են: Վարչապետ Նիկոլ Փաշինյանը 2024-ի հունիսի 13-ին պահանջել էր Բելառուսի նախագահից ներողություն խնդրել՝ Ադրբեջանին 2020թ. 44-օրյա պատերազմի ժամանակ աջակցելու համար։ Փաշինյանն ասել էր, որ ինքը «երբեք չի գնա Բելառուս», քանի դեռ Լուկաշենկոն մնում է նրա նախագահը։ Նույն օրը ՀՀ-ն խորհրդակցությունների նպատակով հրավիրել էր Բելառուսում Հայաստանի դեսպանին: Բելառուսը նույնպես հետ էր կանչել Հայաստանում իր դեսպանին՝ խորհրդակցությունների համար։ Հայաստանի դեսպանը մինչև օրս չի վերադարձել Մինսկ:
Հունվարին՝ Բելառուսում նախագահական ընտրությունների օրը հրավիրված ասուլիսի ժամանակ Լուկաշենկոն կրկին անդրադարձել էր Փաշինյանին և ՀՀ քաղաքականությանը: Նախ զարմացած հարցրել էր՝ ինչո՞ւ են Հայաստանի պաշտոնյաները իրենից նեղացել, երբ ինքն ամեն ինչ է արել պատերազմ չլինելու համար: Արցախի կորստի համար նա մեղավոր էր որակել վարչապետ Փաշինյանին, ապա ասել, որ վերջինս «կկործանի Հայաստանը»:
