ԱՄՆ պետքարտուղար Մարկո Ռուբիոն դատապարտել է Սիրիայում տեղի ունեցած սպանությունները և հայտարարել, որ Վաշինգտոնն աջակցում է երկրում կրոնական և էթնիկ փոքրամասնություններին, ասվում է նրա հայտարարության մեջ:
«Միացյալ Նահանգները դատապարտում է արմատական իսլամիստ ահաբեկիչներին, այդ թվում՝ օտարերկրյա ջիհադիստներին, որոնք վերջին օրերին Արևմտյան Սիրիայում մարդկանց են սպանել։ ԱՄՆ-ն աջակցում է Սիրիայի կրոնական և էթնիկ փոքրամասնություններին, այդ թվում՝ քրիստոնյաներին, դրուզներին, ալավիներին և քրդական համայնքներին և ցավակցություն է հայտնում զոհերին և նրանց ընտանիքներին։ Սիրիայի ժամանակավոր իշխանությունները պետք է պատասխանատվության ենթարկեն սիրիական փոքրամասնությունների այս ջարդերի մեղավորներին»,- ասել է նա։
Մարտի 8-ին Ֆրանսիայի ԱԳՆ-ն խորը մտահոգություն է հայտնել սիրիական Տարտուս, Լաթաքիա և Հոմս նահանգներում տեղի ունեցած բռնությունների կապակցությամբ և դատապարտել «վայրագությունները, որոնք ազդել են կրոնական քաղաքացիական անձանց և բանտարկյալների վրա»։
Փարիզը Սիրիայի ժամանակավոր իշխանություններին կոչ է արել ապահովել այդ հանցագործությունների անկախ հետաքննությունը և մեղավորներին դատապարտել: Արտաքին գործերի նախարարությունը նաև վերահաստատել է Փարիզի հավատարմությունը Սիրիայում «խաղաղ և ներառական քաղաքական անցմանը»՝ զերծ արտաքին միջամտությունից, որը «երաշխավորում է Սիրիայում էթնիկ և կրոնական բազմակարծության պահպանմանը, որը երկրում մասնատումն ու բռնությունը կանխելու միակ միջոցն է»։
Միևնույն ժամանակ, Եվրամիությունը մարտի 8-ի հայտարարության մեջ դատապարտել է «վերջին հարձակումները, որոնք, իբր, իրականացվել են ասադամետ տարրերի կողմից Սիրիայի ափամերձ շրջաններում ժամանակավոր կառավարական ուժերի դեմ, ինչպես նաև ցանկացած բռնություն խաղաղ բնակչության դեմ»:
«Քաղաքացիական անձինք պետք է պաշտպանված լինեն բոլոր հանգամանքներում՝ հարգելով միջազգային մարդասիրական իրավունքը»,- ասել է դաշինքի արտաքին քաղաքականության պատասխանատուն:
Իր հերթին՝ Թուրքիայի արտգործնախարար Հաքան Ֆիդանը սիրիական Լաթաքիայում տեղի ունեցող իրադարձություններն անվանել է սադրանքներ, որոնք սիրիական նոր իշխանությունների ջանքերը խաթարելու նպատակ ունեն։
Սիրիայում զինված հակամարտությունն սկսել էր 2011 թվականից։ Զինադադարը խախտվել էր 2024-ի նոյեմբերի 27-ին, երբ սիրիական մի շարք խմբավորումների զինյալներ՝ «Հայաթ Թահրիր ալ-Շամ» իսլամիստական խմբավորման գլխավորությամբ, հարձակում էին սկսել երկրի հյուսիս-արևմուտքում կառավարական ուժերի դեմ: Նրանք մեկ շաբաթվա ընթացքում գրավել էին երկրի բոլոր խոշոր քաղաքները՝ Հալեպը, Համան, Հոմսը և Դամասկոսը: Ավելի ուշ՝ դեկտեմբերին, այս խմբերը ձևավորել էին նոր կառավարություն:
Հունվարի 13-ին «Գանձասար» թերթի խմբագիր Զարմիկ Պողիկյանն Armenia Today-ին հայտնել էր, որ հայկական համայնքի նկատմամբ նոր իշխանությունների վերաբերմունքը շատ հարգալից է։
Մարտի 6-ին Լաթաքիա, Տարտուս և Հոմս նահանգներում բախումներ էին սկսվել անվտանգության ուժերի և նախկին նախագահի կողմնակիցների զինված խմբերի միջև։ Ամենածանր բախումները տեղի են ունեցել Ջեբլա քաղաքում, որտեղ ապրում են ալավիները՝ կրոնական փոքրամասնություն, որին պատկանում է Ասադների ընտանիքը։ Մարտի 7-ին նոր իշխանությունները վերահսկողության տակ էին վերցրել Լաթաքիա քաղաքը՝ հեռացնելով Ասադի զինված կողմնակիցներին։ Բախումների հետևանքով զոհվել էր շուրջ 200 անձ։ Մարտի 8-ին «Գանձասար»-ը հայտնել էր, որ Լաթաքիայի հայերին հրահանգվել է տներից դուրս չգալ, ավելի ուշ տեղեկացրել Լաթաքիայում կրակոցների հետևանքով երկու հայի զոհվելու մասին։
