Շվեդ բնապահպանական ակտիվիստ Գրետա Թունբերգը հայտարարել է Թբիլիսիում ակցիա անցկացնելու մասին, որն ուղղված է ՄԱԿ-ի Կլիմայի փոփոխության 29-րդ համաժողովը (COP29) Բաքվում անցկացնելու դեմ:
The Guardian-ի հոդվածում նա երկրներին կոչ է արել պատժամիջոցներ սահմանել Ադրբեջանի նախագահ Իլհամ Ալիևի ռեժիմի դեմ և հորդորել դիվանագիտական ջանքերով հասնել հայ պատանդների և բոլոր գերիների ազատմանն ադրբեջանական բանտերից։ Նա նաև կոչ է արել ապահովել հայերի՝ Լեռնային Ղարաբաղ անվտանգ վերադառնալու իրավունքը:
Թունբերգն Ադրբեջանի իշխանություններին մեղադրել է Լեռնային Ղարաբաղի հայերի էթնիկ զտման, տարածաշրջանային հակամարտությունների սրման, ինչպես նաև կլիմայի գագաթաժողովը կեղծ «կանաչ» օրակարգի քողի տակ օգտագործելով ազդեցության ուժեղացման նպատակ հետապնդելը: Ակցիան տեղի կունենա նոյեմբերի 11-ին՝ ժամը 19:00-ին Թբիլիսիում:
«Լեռնային Ղարաբաղում ապրող էթնիկ հայերի դեմ Ալիևի ռեժիմի կողմից իրականացված մարդու իրավունքների սարսափելի խախտումներից հետո գլոբալ խաղաղության մասին խոսելն առնվազն սրտաճմլիկ է։ Ավելին, Ադրբեջանը ծրագրում է քողարկել հայերի դեմ իր հանցագործությունները՝ ստեղծելով «կանաչ էներգիայի գոտի» այն տարածքներում, որտեղ բնակչությունը ենթարկվել է էթնիկ զտումների»,- ասվում է հրապարակման մեջ։
Թունբերգն անվիճելի է համարել արևմտյան երկրների դերը Հարավային Կովկասում «ավտորիտար դրեյֆում» և նշել, որ հենց նրանք են լեգիտիմացնում և ֆինանսավորում ռեպրեսիվ ռեժիմները՝ հանուն էներգետիկ ռեսուրսների և շահույթի:
«Ավելի քան 20 տարի է, ինչ ադրբեջանական ռեժիմն Ալիևի ղեկավարությամբ ժողովրդին պահում է ճնշման տակ՝ նպաստելով աղքատությանը, վախին և լռությանը»,- գրել է ակտիվիստն Instagram-ում։
Բաքուն հաստատել էր 23 հայ գերիների առկայությունը, որոնցից 17-ը գերեվարվել էին 2023 թվականի սեպտեմբերին Արցախի վրա հարձակումից հետո։ Խոսքը նաև Արցախի նախկին ղեկավարների մասին է։
2023 թվականի սեպտեմբերի վերջին Ադրբեջանի իշխանություններն առևանգել էին Արցախի նախկին պետնախարար Ռուբեն Վարդանյանին, հանրապետության Պաշտպանության նախկին նախարար Լևոն Մնացականյանին, Արցախի ՊԲ հրամանատարի նախկին առաջին տեղակալ Դավիթ Մանուկյանին, նախկին արտգործնախարար Դավիթ Բաբայանին, Արցախի նախկին նախագահներ Արկադի Ղուկասյանին, Բակո Սահակյանին և Արայիկ Հարությունյանին, ինչպես նաև ԱԺ նախագահ Դավիթ Իշխանյանին։
