Մերձմոսկովյան շրջանում ահաբեկչություն կատարելու մեղադրանքով ձերբակալվածները փորձել են թաքնվել Ուկրաինայի տարածքում, ռուսներին ուղղված ուղերձում հայտարարել է ՌԴ նախագահ Վլադիմիր Պուտինը։ Նախագահը տեղի ունեցածն անվանել է «արյունոտ, բարբարոսական ահաբեկչություն»։
Նա նշել է, որ ահաբեկչության բոլոր չորս անմիջական մեղավորները հայտնաբերվել և կալանավորվել են։ Պուտինի խոսքով՝ ձերբակալվածները «փորձել են փախչել և շարժվել դեպի Ուկրաինա, որտեղ, ըստ նախնական տվյալների, նրանց համար ուկրաինական կողմից պատրաստվել է պետական սահմանը հատելու «պատուհան»։ Նա հայտնել է, որ ահաբեկչությանն առնչություն ունենալու կասկածանքով, ընդհանուր առմամբ, բերման է ենթարկվել 11 մարդ։
Նախագահի խոսքով՝ Ռուսաստանի Անվտանգության դաշնային ծառայությունը և այլ իրավապահ մարմիններ «աշխատում են ահաբեկիչների ամբողջ հանցակից բազայի բացահայտման և հայտնաբերման ուղղությամբ՝ նրանց, ովքեր տրանսպորտ են տրամադրել, նախանշել են հանցագործության վայրից փախուստի ուղիները, պատրաստել պահարանները, զենքի պահեստները և զինամթերք»։
Նա նաև հայտարարել է Մոսկվայում, Մոսկվայի մարզում և Ռուսաստանի Դաշնության բոլոր շրջաններում հակաահաբեկչական և հակադիվերսիոն լրացուցիչ միջոցառումների ներդրման մասին։ «Հիմա գլխավորն այն է, որ թույլ չտանք նրանց, ովքեր կանգնած են այս արյունահեղության հետևում, նոր հանցագործություն կատարել»,- ասել է Պուտինը:
Նախագահը նաև հայտնել է, որ կիրակի օրը՝ մարտի 24-ը, Ռուսաստանում համազգային սգո օր է հայտարարված։
Մարտի 23-ին ՌԴ Քննչական կոմիտեն հայտնել էր ահաբեկչության 115 զոհի մասին։ Ավելի ուշ ՌԴ ԱԴԾ տնօրեն Ալեքսանդր Բորտնիկովը նախագահ Վլադիմիր Պուտինին զեկուցել էր 11 մարդու, այդ թվում՝ ահաբեկչությանն անմիջականորեն ներգրավված բոլոր չորս ահաբեկչի ձերբակալության մասին։ Ահաբեկչության կասկածանքով ձերբակալվածներից մեկը խոստովանել էր, որ ժամանել է Թուրքիայից։
Հայաստանի ԱԳՆ-ն դատապարտել էր Մոսկվայի Crocus City Hall համալիրում տեղի ունեցած ահաբեկչությունը։ Հայաստանի արտգործնախարարության մամուլի քարտուղար Անի Բադալյանն Armenia Today-ին հայտնել էր, որ ճշտվում են տեղի ունեցած ահաբեկչության հետևանքով տուժածների թվում հայերի մասին տեղեկությունները։ Ավելի ուշ Հայաստանի վարչապետ Նիկոլ Փաշինյանն ահաբեկչության կապակցությամբ ցավակցություն էր հայտնել ՌԴ նախագահ Վլադիմիր Պուտինին։
