ՄԱԳԱՏԷ-ի ղեկավար Ռաֆայել Գրոսին ՄԱԿ-ի գլխավոր քարտուղար ընտրվելու դեպքում մտադիր է կազմակերպությունը դարձնել ավելի «ճկուն», կենտրոնացված և համաչափ, հայտնում է The Financial Times-ը։
Նրա խոսքով՝ ՄԱԿ-ի համակարգում չափազանց շատ կառույցներ նույն աշխատանքն են կատարում, մասնավորապես՝ կլիմայական և զարգացման ծրագրերում։
«Պետք է ՄԱԿ-ը վերադարձնել ճիշտ ուղու վրա։ Մեզ հարկավոր է ավելի կենտրոնացված, ճիշտ չափի բերված կազմակերպություն»,- նշել է Գրոսին։
Նա նաև հայտարարել է, որ ՄԱԿ-ի համակարգում որոշ գործառույթներ կրկնվում են «երկու, երեք, իսկ որոշ դեպքերում՝ չորս անգամ»։
ՄԱԿ-ի հաջորդ գլխավոր քարտուղարը պաշտոնը պետք է ստանձնի 2027 թվականի հունվարի 1-ին, քանի որ Անտոնիու Գուտերեշի լիազորությունների ժամկետը լրանում է 2026 թվականի դեկտեմբերի 31-ին։ Ընտրության գործընթացը մեկնարկել է 2025 թվականի նոյեմբերի 25-ին․ թեկնածուներին առաջադրում են ՄԱԿ-ի անդամ պետությունները, որից հետո նրանք մասնակցում են հրապարակային քննարկումների, իսկ վերջնական փուլում նրանց թեկնածությունները դիտարկվում են ՄԱԿ-ի Անվտանգության խորհրդում։
ՄԱԿ-ի գլխավոր քարտուղարի պաշտոնի հավակնորդների թվում են Գրոսին, Չիլիի նախկին նախագահ Միշել Բաչելետը, UNCTAD-ի գլխավոր քարտուղար Ռեբեկա Գրինսպանը, Սենեգալի նախկին նախագահ Մակի Սալը, Էկվադորի նախկին ԱԳ նախարար Մարիա Ֆերնանդա Էսպինոսան և Գայանայի ներկայացուցիչ Քերոլին Ռոդրիգես-Բիրկեթը։ Վերջնական թեկնածուին պետք է առաջարկի Անվտանգության խորհուրդը, որտեղ որոշիչ դեր ունի հինգ մշտական անդամ՝ ԱՄՆ-ն, Ռուսաստանը, Չինաստանը, Ֆրանսիան և Մեծ Բրիտանիան։
