Մարտի 1-ին Իսրայելը շարունակել է հարվածներ հասցնել Իրանին, ինչին ի պատասխան՝ Թեհրանը նոր հարվածներ է հասցրել Իսրայելին և Պարսից ծոցի մի շարք երկրների տարածքում գտնվող օբյեկտներին։
Al Jazeera-ի փոխանցմամբ՝ Իսրայելի պաշտպանության նախարար Իսրայել Կացը հայտարարել է, որ իսրայելական բանակն «ինտենսիվ հարվածներ է հասցնում իրանական ռեժիմին պատկանող օբյեկտներին», այդ թվում՝ Թեհրանում։ ԶԼՄ-ների տվյալներով՝ Իրանի մայրաքաղաքում հարվածներ են հասցվել 7 օբյեկտի։
Իրանի ԱԳՆ-ն հայտնել է, որ փետրվարի 28-ին երկրի հարավում՝ Մինաբ քաղաքում, աղջիկների դպրոցի վրա հասցված հարվածի հետևանքով զոհվել է 140 աշակերտուհի։
Իսրայելում, իսրայելական ԶԼՄ-ների տվյալներով, մարտի 1-ին Բեյթ-Շեմեշ քաղաքում՝ Երուսաղեմի մերձակայքում, իրանական հրթիռի ընկնելու հետևանքով զոհվել է 8 մարդ, շուրջ 20-ը՝ վիրավորվել։ Վնասվել են շենքեր։
Ավելի վաղ Իրանի Իսլամական հեղափոխության պահապանների կորպուսը (ԻՀՊԿ) հայտարարել էր տարածաշրջանում Իսրայելի և ԱՄՆ-ի բազաների ուղղությամբ հրթիռային և անօդաչու սարքերով հարվածներ հասցնելու մասին։ ԻՀՊԿ-ի տվյալներով՝ թիրախավորվել է 27 ամերիկյան բազա, ինչպես նաև Իսրայելի Թել Նոֆ ավիաբազան և Թել Ավիվում գտնվող իսրայելական բանակի հրամանատարական շտաբը։
Մերձավորարևելյան և միջազգային ԶԼՄ-ների փոխանցմամբ՝ հարվածներ են հասցվել Սաուդյան Արաբիայի, Արաբական Միացյալ Էմիրությունների, Կատարի, Բահրեյնի և Օմանի տարածքներին։ Մասնավորապես, ԱՄԷ-ում հաղորդվում է Աբու Դաբիի և Դուբայի օդանավակայանների վրա հարվածների մասին։ ԱՄԷ պաշտպանության նախարարությունը հայտնել է, որ փետրվարի 28-ից Իրանի կողմից սկսված հարվածների հետևանքով երկրում զոհվել է 3 մարդ, 58-ը՝ վիրավորվել։
Պայթյունների ձայն է լսվել նաև Սաուդյան Արաբիայի մայրաքաղաք Էր Ռիադում։ Բահրեյնի իշխանությունները հայտարարել են Մանամայում գտնվող հյուրանոցի վնասման մասին։ Օմանում երկու անօդաչու սարք հարվածել է Դուկմ նավահանգստին։ Օմանի ափերի մոտ հարձակման են ենթարկվել նաև Պալաուի դրոշի ներքո գործող տանկերը։
Հաղորդվում է նաև, որ ամերիկյան հակաօդային պաշտպանության համակարգերն Իրաքի հյուսիսում՝ Էրբիլի օդանավակայանի մոտ գտնվող ռազմական բազայի վրա, խոցել են անօդաչու սարք։ Մեծ Բրիտանիայի պաշտպանության նախարար Ջոն Հիլին հայտարարել է, որ երկու հրթիռ է արձակվել Կիպրոսի ուղղությամբ։
Փետրվարի 28-ի առավոտյան Իսրայելը հայտարարել էր Իրանի դեմ «լայնածավալ մարտական գործողություններ» սկսելու մասին: Ավելի ուշ ԱՄՆ-ն միացել էր գործողությանը: Ի պատասխան՝ Իրանը հայտարարել էր Իսրայելի և տարածաշրջանում ամերիկյան թիրախների դեմ հրթիռային գործողության մեկնարկի մասին: Մարտի 1-ին Իրանը հաստատել էր երկրի Գերագույն հոգևոր առաջնորդ այաթոլլա Ալի Խամենեիի մահը:
Ռազմական գործողությունների հետևանքով չեղարկվել էին Երևանից ԱՄԷ և Մերձավոր Արևելքի մի շարք քաղաքներ և հակառակ ուղղություններով չվերթերը։ ՀՀ ԱԳՆ-ն հայտնել էր ԱՄԷ-ում գտնվող ՀՀ քաղաքացիների՝ Օմանով Հայաստան մեկնելու հնարավորության մասին։ Մարտի 1-ի՝ ժամը 15։30-ի դրությամբ, Մերձավոր Արևելքում զոհերի թվում հայեր չկան։
