Պորտուգալիայի հավաքականի ֆուտբոլիստ Կրիշտիանու Ռոնալդուն Սաուդյան Արաբիայի թագաժառանգ Մոհամմադ բեն Սալմանի հետ ներկա է գտնվել Սպիտակ տանը կայացած հանդիսավոր ընթրիքին: ԱՄՆ նախագահ Դոնալդ Թրամփը հայտարարել է, որ որդին Ռոնալդուի մեծ երկրպագուն է, գրում է BBC-ն:
Միջոցառման մեկնարկից առաջ ելույթ ունենալով՝ Թրամփն ասել է, որ իր համար պատիվ է հյուրընկալել Ռոնալդուին, ում գլխավոր դերը Սաուդյան ֆուտբոլային լիգայում թույլ է տվել նրան դառնալ թագաժառանգի ղեկավարությամբ երկրի արդիականացման ծրագրի դեմքը:
Ավելի վաղ Սպիտակ տան ներկայացուցիչը հաստատել էր, որ Ռոնալդուն ներկա է լինելու, սակայն չէր հայտնել, որ նա Սաուդյան Արաբիայի թագաժառանգի պաշտոնական պատվիրակության կազմում է:
Թրամփն ընթրիքի ժամանակ իր ելույթն օգտագործել է Սաուդյան Արաբիայի հետ ավելի սերտ կապերը գովաբանելու համար՝ երկիրն անվանելով «ՆԱՏՕ-ի անդամ չհանդիսացող գլխավոր դաշնակից»:
Սա 2016 թվականից ի վեր Ռոնալդուի առաջին հայտնի այցերից մեկն է ԱՄՆ: Նա այժմ հանդես է գալիս «Ալ Նասր» ֆուտբոլային ակումբում, որը պատկանում է ինքնիշխան հարստության հիմնադրամին՝ PIF-ին, որի նախագահը թագաժառանգն է։
