Հայաստանի ֆուտբոլի ազգային հավաքականը 2026 թվականի աշխարհի առաջնության ընտրական փուլի վերջին՝ արտագնա խաղում 1-9 հաշվով պարտվել է Պորտուգալիային։
Պորտուգալիայի ընտրանու պաշտպան Ռենատո Վեյգան հաշիվը բացել է 7-րդ րոպեին։ Հայաստանի հավաքականի կիսապաշտպան Էդուարդ Սպերցյանը 18-րդ րոպեին խփել է պատասխան գոլը։ Հարձակվող Գոնսալո Ռամոսը 28-րդ րոպեին կրկին առաջ է մղել իր ընտրանուն։ Կիսապաշտպան Ժոաո Նևեշը 30-րդ րոպեին կրկին գրավել է Հայաստանի հավաքականի դարպասը, իսկ 41-րդ րոպեին տուգանային հարվածից դուբլ ձևակերպել: Բրունո Ֆերնանդեշը խփել է դաշտի տերերի հինգերորդ գոլը 45-րդ րոպեին՝ իրացնելով 11 մետրանոց հարված։
Երկրորդ խաղակեսում Ֆերնանդեշը խփել է իր երկրորդ գոլը՝ 52-րդ րոպեին, իսկ 72-րդ րոպեին իրացրել 11 մետրանոց հարված և դարձել հեթ-տրիկի հեղինակ։ Նևեշը գոլ է խփել 81-րդ րոպեին։ Խաղի վերջում՝ 90+2-րդ րոպեին, հարձակվող Չիկո Կոնսեյսաոն հաշիվը դարձրել է 9։1։
Այս հաղթանակից հետո Պորտուգալիան որակավորվել է 2026 թվականի աշխարհի առաջնության համար, որը կկայանա Միացյալ Նահանգներում, Կանադայում և Մեքսիկայում: Թիմը F խմբում զբաղեցրել է առաջին տեղը՝ 13 միավորով: Հայաստանի ընտրանին զբաղեցրել է չորրորդ տեղը՝ 3 միավորով:
Սեպտեմբերի 6-ին աշխարհի 2026թ․ առաջնության որակավորման փուլի մեկնարկային տուրում Հայաստանի հավաքականը Երևանում խոշոր՝ 0։5 հաշվով պարտվել էր Պորտուգալիայի ընտրանուն։ Սեպտեմբերի 9-ին որակավորման փուլի 2-րդ տուրի խաղում 2։1 հաշվով հաղթել էր Իռլանդիային։ Հոկտեմբերի 11-ին Հայաստանի հավաքականը 3-րդ տուրում 0։2 հաշվով պարտվել էր Հունգարիային, հոկտեմբերի 15-ին՝ զիջել Իռլանդիային։ Նոյեմբերի 13-ին Հայաստանի հավաքականը 0։1 հաշվով պարտվել էր Հունգարիային։
