«Արարատցեմենտ» ընկերության կառավարումը պետությանը փոխանցվելուց հետո հուլիս ամսվա ընթացքում սահմանված կարգով կնշանակվի գործարանի նոր կառավարիչ, հայտնել է ՀՀ էկոնոմիկայի նախարար Գևորգ Պապոյանը։
Նախարարը նախազգուշացրել է ընկերության աշխատակիցներին բարեխղճորեն կատարել իրենց պարտականությունները՝ մատնանշելով, որ հակառակ դեպքում՝ կարող են առաջանալ աշխատանքից ազատման, ինչպես նաև վարչական ու քրեական պատասխանատվության ենթարկելու հիմքեր։
Պապոյանը նշել է, որ կշարունակեն աշխատել միայն նրանք, ովքեր իրենց պարտականությունները կկատարեն պարտաճանաչ։
Ավելի վաղ Հակակոռուպցիոն դատարանը, Գլխավոր դատախազության միջնորդության հիման վրա, որոշում էր կայացրել «Արարատցեմենտ»-ը հանձնել ՀՀ կառավարմանը՝ ի դեմս Էկոնոմիկայի նախարարության։
ՀՀ վարչապետ Նիկոլ Փաշինյանի և Ծառուկյանի միջև հեռակա բանավեճ էր սկսվել 2026-ի ԱԺ ընտրությունների նախընտրական փուլում։ Փաշինյանը հայտարարել էր, որ «միլիարդատեր» քաղաքական գործիչները պետք է սնանկանան՝ նկատի ունենալով նաև Ծառուկյանին։ Այս ընթացքում Փաշինյանը հայտարարել էր նաև «Արարատցեմենտը» պետության վերահսկողության տակ վերցնելու մասին, ինչից հետո ընկերությանն առնչվող վարույթներ էին նախաձեռնվել։
Ծառուկյանը ներգրավված է առանձնապես խոշոր չափերով հարկերից խուսափելու վարույթում, ինչի պատճառով արգելվել է նաև ելքը ՀՀ-ից։ Նրան մեղադրում են նաև խոշոր չափերով խարադախության, առանձնապես խոշոր չափերով փողերի լվացման, ինչպես նաև ապօրինի որսի մեջ, և այդ վարույթի շրջանակում նրա առաձնատնից առգրավվել էին կենդանիների խրտվիլակներ, ինչպես նաև 3 առյուծ և 1 վագր, առյուծներից մեկը քնեցումից չէր արթնացել։
Հուլիսի 6-ի առավոտյան Ծառուկյանի բնակարանում, ինչպես նաև ավելի քան 70 ընկերությունում խուզարկություններից հետո նրան ձերբակալել էին, հուլիսի 7-ին՝ կալանավորել։ Ծառուկյանն իրեն առաջադրված մեղադրանքները չի ընդունել՝ դրանք անվանելով «սուտ» և «փուչիկ»։
Ծառուկյանի բազմաթիվ ընկերություններ շարունակում են կապարակնքված մնալ, ինչն առաջացրել է աշխատակիցների դժգոհությունը և բողոքի ակցիաների պատճառ դարձել։ «Արարատցեմենտի» աշխատանքը վերսկսել էր աշխատակիցների բողոքի ակցիաներից հետո, մյուս ընկերությունները շարունակում են փակ մնալ։
