Հայաստանի հրաձգության հավաքականն առաջին տեղն է զբաղեցրել շարժվող թիրախ մրցաձևի աշխարհի առաջնության մեդալային հաշվարկում՝ նվաճելով 9-ը մրցանակ՝ 5 ոսկե, 1 արծաթե և 3 բրոնզե մեդալ, հայտնել է ԿԳՄՍ նախարարության մամուլի ծառայությունը։
Մրցաշարն անցկացվել է հուլիսի 20-26-ը՝ Տալլինում։ Պատմության մեջ առաջին անգամ Հայաստանի հավաքականի ներկայացուցիչները դարձել են աշխարհի չեմպիոններ։
Մեծահասակների պայքարում ոսկե մեդալներ են նվաճել Հայկ Մինասյանը և Գոռ Խաչատրյանը։ Նրանք Հովհաննես Մարգարյանի հետ հաղթել են նաև թիմային մրցաշարի «նորմալ վազք» մրցաձևում։
Երիտասարդների աշխարհի առաջնությունում Աիդա Ազատյանը նվաճել է 2 ոսկե մեդալ։
Տղամարդկանց թիմը՝ Հայկ Մինասյան, Գոռ Խաչատրյան և Հովհաննես Մարգարյան կազմով, արծաթե մեդալ է ստացել «խառը վազք» մրցաձևում և 2 բրոնզե մեդալ՝ 50 մետր հեռավորության թիմային մրցումներում։ Եվս մեկ բրոնզե մեդալ անհատական հաշվարկում նվաճել է Մինասյանը։
Աշխարհի առաջնությունում Հայաստանը ներկայացրել է 12 հրաձիգ։
