Հայ դահուկորդ Միքայել Միքայելյանը մասնակցել է իր երրորդ Օլիմպիական խաղերին, հաղորդվում է Իտալիայում անցկացվող Ձմեռային խաղերի կայքում։ Իտալիայի Միլան և Կորտինա դ’Ամպեցո քաղաքներում ընթացող 25-րդ ձմեռային Օլիմպիական խաղերում Հայաստանի ներկայացուցիչն զբաղեցրել է 48-րդ տեղը՝ 20 կիլոմետրանոց անհատական ժամանակաչափում։
Մրցումներին մասնակցել է 75 մարզիկ։ Դահուկորդը ներկայացրել է Հայաստանը 2018 և 2022 թվականների ձմեռային Օլիմպիական խաղերում։ Փետրվարի 13-ին Միքայելյանը հանդես կգա 10 կմ ինտերվալ (ազատ ոճ) մրցաձևում:
Հայաստանի օլիմպիական հավաքականի անդամ Կատյա Գալստյանը, հանդես գալով դահուկավազքի 20 կմ սկիաթլոն (դասական/ազատ ոճ) մրցաձևում, առաջին 10 կմ դասական ոճն անցնելուց հետո չի հատել եզրագիծը։ Կանանց սկիաթլոնում օլիմպիական չեմպիոնի տիտղոսը նվաճել է Շվեդիայի ներկայացուցիչ Ֆրիդա Կարլսոնը՝ 53 րոպե 45 վայրկյան արդյունքով: Գալստյանը 4-րդ անգամ է մասնակցում ձմեռային Օլիմպիական խաղերին: Փետրվարի 12-ին նա հանդես կգա 10 կմ ինտերվալ (ազատ ոճ) մրցաձևում:
Լեռնադահուկորդ Հարություն Հարությունյանը փետրվարի 14-ին կմասնակցի հսկա ոլորավայրէջք, իսկ փետրվարի 16-ին՝ ոլորավայրէջք մրցաձևերին:
Կարինա Ակոպովա-Նիկիտա Ռախմանին գեղասահքի սպորտային զույգը կարճ ծրագրի որակավորման փուլում հանդես կգա փետրվարի 15-ին: Ազատ ծրագրի որակավորման փուլը տեղի կունենա փետրվարի 16-ին:
Միքայելյանը նախկինում տուգանվել էր Դահուկավազքի և սնոուբորդի միջազգային ֆեդերացիայի (FIS) կողմից՝ իր համազգեստի վրա «Ադրբեջան» բառը ծածկելու համար։ Այնուամենայնիվ, նա նշել էր, որ իր գործողությունները սխալ չի համարում: Մարզիկն իր սարքավորումներն ստացել էր մեկնարկից երկու ժամ առաջ և, տեսնելով գրությունը, որոշել էր չմասնակցել մրցավազքին՝ այդ երկրի անունը կրծքին գրված։
