Կառավարությունը պլանավորում է գիտության ոլորտին հատկացվող պետական ֆինանսավորումը նվազեցնել շուրջ 20 տոկոսով: Գործադիրը 2026 թվականի բյուջեի նախագծում գիտության ոլորտին նախատեսում է մոտ 71 միլիոն դոլար հատկացնել, ինչը 17 միլիոն դոլարով քիչ է 2025 տարվա բյուջետային ծրագրից: Միևնույն ժամանակ՝ մտադիր է 2026 թվականին 13 միլիոն դոլար հատկացնել «Ակադեմիական քաղաքին»:
Վարչապետ Նիկոլ Փաշինյանը դեռ 2023-ին հայտարարել էր, որ ինչպես նախկինում չեն պատկերացրել, ապագայում էլ չեն պատկերացնում Հայաստանն առանց զարգացած գիտակրթական ոլորտի: «Հենց կրթության, գիտության մեջ ենք տեսնում ՀՀ ապագայի ռազմավարական պլանավորումն ու ապահովումը»,- ասել էր Փաշինյանը:
Armenia Today-ի նկարահանող խումբը ՀՀ քաղաքացիներից հետաքրքրվել է, թե ինչպե՞ս են գնահատում գիտության ֆինանսավորման կրճատումը և ի՞նչ հնարավոր ռիսկեր ու հետևանքներ են տեսնում:
Հարցման մասնակիցների մեծ մասը նշել է, որ գիտության ոլորտը Հայաստանում այլևս «կենդանի չէ»:
«Գիտության ոլորտը դեռ գործո՞ւմ է Հայաստանում, ասեմ Ձեզ՝ ոչ, անունն է մնացել»,- ասել է քաղաքացիներից մեկը:
Գիտության աշխատողները «ողբալի, խղճալի վիճակում են»,- հավելել է հարցման մեկ այլ մասնակից:
«Սխալ կլինի, պիտի ֆինանսավորեն, որ երեխեքը սովորեն»,- նշել է մեկ ուրիշը:
Քաղաքացիների մի մասն էլ կարծում է, որ հեղափոխությունից հետո գիտության ոլորտում բարեփոխումներ կատարվել են:
«Լավ-լավ ծրագրեր է ներդրել կառավարությունը: Ես տարբերությունը շատ զգում եմ: Ահռելի տարբերություն կա»,- նշել է հարցման մեկ այլ մասնակից:
Քաղաքացիներից մեկն էլ շեշտել է, որ «հրաշք փոփոխություններ» են կատարվում:
Մանրամասները՝ տեսանյութում:
