«Կորցնում ենք, հետո գնահատում», «Խաղից գոհ չենք», «Թիմի ուղեղը՝ Մխիթարյանը»․ քաղաքացիները՝ ֆուտբոլից

Ֆուտբոլի աշխարհի 2026 թվականի առաջնության եվրոպական գոտու որակավորման փուլի F խմբի մեկնարկային տուրում Հայաստանի ազգային հավաքականը Երևանի Վազգեն Սարգսյանի անվան «Հանրապետական» մարզադաշտում ընդունել էր Պորտուգալիայի ընտրանուն։

Խաղն ավարտվել էր 0։5 հաշվով՝ հօգուտ Պորտուգալիայի։

Առաջնության որակավորման փուլի 2-րդ տուրում Հայաստանի հավաքականը 2։1 հաշվով սեփական հարկի տակ հաղթել էր Իռլանդիային։

Ավելի ուշ Հայաստանի հավաքականի գլխավոր մարզիչ Եղիշե Մելիքյանը Հանրային հեռուստաընկերության եթերում հայտարարել էր, որ պատրաստվում է բանակցել հավաքականի նախկին ավագ, Միլանի «Ինտերի» կիսապաշտպան Հենրիխ Մխիթարյանի հետ՝ ֆուտբոլիստի հնարավոր վերադարձի շուրջ։

Միևնույն ժամանակ՝ նա շեշտել էր, որ դեռ չգիտի Մխիթարյանի կարծիքը վերադարձի վերաբերյալ և մտադիր է մեկնել Իտալիա՝ նրա հետ խոսելու նպատակով։

Armenia Today-ը քաղաքացիներից հետաքրքրվել է՝ հետևո՞ւմ են արդյոք աշխարհի առաջնությանը, գո՞հ են Հայաստանի հավաքականի խաղից, ո՞ր հավաքականին են սատարում և ինչպե՞ս են վերաբերվում Մխիթարյանին հավաքական վերադարձնելու Մելիքյանի հայտարարությանը։

Հարցվածներից մի մասը դժգոհ էր Հայասատանի հավաքականի խաղից, և իրենց համար Պորտուգալիային պարտվելը զարմանալի չէր։

«Պորտուգալիայի հետ խաղը չեմ նայել, կանխատեսել էի, որ նայելու խաղ չէ, բայց, բնականաբար, սատարում եմ Հայաստանին։ Մխիթարյանի վերադարձն ինքն է որոշելու։ Կորցնում ենք, հետո արժեքը գնահատում»,- ասաց քաղաքացիներից մեկը։

Հարցվածներից մի քանիսն էլ նշեցին, որ հետևում են առաջնությանը․ «Բոլորն էլ լավն են։ Հենրիխ Մխիթարյանը շատ լավ ֆուտբոլիստ է, շատ լավ կողմնորոշվում է, նա կարող է օգնել մեր հավաքականին»։

Քաղաքացիներից ոմանք պատասխանեցին, որ ֆուտբոլ չեն սիրում և չեն հետևում խաղերին։

Մանրամասները՝ տեսանյութում։