ՀՀ կառավարությունը մարտի 13-ի նիստում որոշել է 44-օրյա պատերազմում անհայտ կորած 22 զինծառայողների ընտանիքների աջակցության տրամադրման ժամկետը երկարաձգել մինչև մարտ ամիսը ներառյալ։
Նախագծում նշվում է, որ կառավարության 2020 թվականի դեկտեմբերի 10-ի որոշմամբ նախատեսված էր մինչև 2025թ. հունվար ամիսը ներառյալ ամենամսյա դրամական վճարի ձևով սոցիալական աջակցության տրամադրել զինծառայողի ընտանիքին՝ ամսական 300 000 դրամի չափով՝ մինչև անհայտ կորած զինծառայողին դատական կարգով անհայտ բացակայող ճանաչելը:
Գտնվելու վայրն անհայտ զինծառայողների ընտանիքներին ամենամսյա դրամական վճարի տրամադրումը դադարեցվել էր 2025թ. փետրվարի 1-ից: «Առկա իրողություններով պայմանավորված»՝ առաջարկվել է աջակցության վճարման ժամկետը երկարաձգել մինչև մարտ:
Շահառու հանդիսացող ընտանիքների աջակցության հաշվարկը 2025 թվականի փետրվար և մարտ ամիսների համար կազմում է 13.200.000 դրամ:
Հունվարի 30-ին կառավարությունը երկու ամսով երկարաձգել էր 11 անհետ կորած ընտանիքներին ֆինանսական աջակցության տրամադրման ժամկետը։
ՀՀ կառավարությունն անհետ կորած և գերեվարված զինծառայողների ընտանիքներին ֆինանսական աջակցություն տրամադրելու որոշում էր ընդունել 2020 թվականի դեկտեմբերի 10-ին։ 2020-ից սկսած կառավարությունը երկարաձգում է աջակցության ծրագրի ժամկետները։
Armenia Today-ի հարցմանն ի պատասխան՝ 2024-ին ՀՀ քննչական կոմիտեից հայտնել էին, որ 1992-2023 թվականներին Արցախի և Հայաստանի դեմ Ադրբեջանի ձեռնարկած ռազմական գործողությունների հետևանքով անհայտ կորած է համարվում 1016 մարդ։ 2020 թվականի 44-օրյա պատերազմի հետևանքով, ՔԿ տվյալներով, անհայտ է 195 անձի գտնվելու վայրը, որոնց թվում 20 քաղաքացիական անձ և 175 զինծառայող կա։
