«Քաղաքացիական պայմանագիր» կուսակցությունը հայտարարել է, որ կապ չեն տեսնում Միջազգային իրավական հարցերով ներկայացուցիչ Եղիշե Կիրակոսյանի՝ պաշտոնից ազատման դիմում ներկայացնելու և Հայաստանի կողմից Բաքվի դեմ միջազգային դատերից հրաժարվելու հնարավոր պատրաստակամության վերաբերյալ հայտարարությունների միջև, հայտարարել է ՔՊ պատգամավոր Սարգիս Խանդանյանը։
«Կիրակոսյանի աշխատանքից ազատման վերաբերյալ կարող եմ մեկանաբանել այնքանով, որքանով մեկնաբանել է վարչապետի աշխատակազմը, որովհետև ես հավելյալ տեղեկատվության չեմ տիրապետում բացի այն, որ սեփական դիմումի համաձայն է ազատվել, և որ դա ամիսների քննարկիումների արդյունքում է տեղի ունեցել»,- ասել է Խանդանյանը՝ հավելելով, որ ամենևին չէր ցանկանա այս հարցերը կապել իրար հետ, որովհետև դրանք առնչություն չունեն:
Խանդանյանի խոսքով՝ եթե Կիրակոսյանը հետագայում կցանկանա մեկնաբանություն տալ, հետաքրքիր կլինի լսել նրան։ «Բայց չեմ կարծում, որ այստեղ կապ է պետք փնտրել»,- շեշտել է նա:
Անդրադառնալով խաղաղության պայմանագրի վերջին՝ 12-րդ խմբագրությանը, որն Ադրբեջանն ուղարկել է, Խանդանյանն ասել է, որ երկու հոդվածի վերաբերյալ դեռևս կա դիրքորոշումների տարբերություններ:
«Այն առաջարկները, որոնք Հայաստանն ուղարկել էր, Ադրբեջանն ամբողջությամբ կամ մասնակի չէր համաձայնել, տեքստի մասին մեկնաբանություններ անել չեմ կարող: Նոր առաջարկները հիմա քննարկվում են և հնարավորին սեղմ ժամկետում Հայաստանն արդեն սեփական առաջարկով հանդես կգա և կպատասխանի Ադրբեջանին»,- ասել է նա:
Մարտի 5-ին «Արմենպրես»-ը՝ հղում անելով ՀՀ վարչապետի աշխատակազմի տեղեկատվության և հասարակայնության հետ կապերի վարչությանը, հայտարարել էր, որ Կիրակոսյանն ազատվելու է Միջազգային իրավական հարցերով ներկայացուցչի պաշտոնից՝ սեփական դիմումի համաձայն՝ «ամիսներ առաջ ձեռք բերված պայմանավորվածությամբ»։
Ավելի վաղ ԶԼՄ-ներում լուրեր էին տարածվել, որ Միջազգային իրավական հարցերով ներկայացուցչի գրեթե ողջ գրասենյակը՝ Կիրակոսյանի գլխավորությամբ, աշխատանքից ազատման դիմում է գրել: Գրասենյակից հերքել էին այս տեղեկությունը՝ նշելով, որ «գրասենյակը բնականոն հունով շարունակում է իր գործառույթների իրականացումը»։
ԶԼՄ-ները գրում են, որ հրաժարականը կապված է միջազգային ատյաններում Ադրբեջանի դեմ հայցերից հրաժարվելու Բաքվի պահանջի հետ։ 2024 թվականի սեպտեմբերին կառավարությունից ո՛չ հերքել, ո՛չ հաստատել էին Կիրակոսյանի՝ հրաժարականի դիմում ներկայացնելու մասին լուրերը։
2024 թվականի հունիսին Միջազգային իրավական հարցերով ՀՀ ներկայացուցչի գրասենյակն Aysor․am-ին հերքել էր տեղեկությունը, ըստ որի՝ «Ադրբեջանի կողմից ստացված խաղաղության պայմանագրի 10-րդ փաթեթում Ալիևի վարչակազմը պահանջում է, որպեսզի Հայաստանը հրաժարվի միջազգային տարբեր ատյաններում Ադրբեջանի դեմ ներկայացված բոլոր հայցերից»։ Անդրադառնալով միջազգային տարբեր ատյաններում Ադրբեջանի դեմ ներկայացված հայցերից հրաժարվելու պահանջին՝ նրանք նշել էին, որ «այս պահին նման որոշում չկա»։
