Ազգային ժողովում հունվարի 30-ին անհետ կորածների ծնողների, պատգամավորների և ուժային կառույցների ներկայացուցիչների մասնակցությամբ դռնփակ նիստը լարված է անցել, ծնողների մի մասի ինքնազգացողությունը վատացել է, գրել է «Ժողովուրդ» օրաթերթը՝ հղում անելով իր աղբյուրներին։
Թերթի տեղեկություններով՝ ՀՀ Քննչական կոմիտեի նորանշանակ ղեկավար Արթուր Պողոսյանը չի կարողացել առարկայական պատասխաններ տալ ծնողներին, ովքեր, ըստ թերթի, դժգոհել են նաև գլխավոր դատախազ Աննա Վարդապետյանից, որն իրավաբանական բարդ ու անհասկանալի ձևակերպումներով է խոսել։
«Ծնողները պահանջել են իրենց տրամադրել որդիների մասին անհատական տեղեկություններ, սակայն Պողոսյանը չի կարողացել տալ դրանք: ՔԿ Երևանի քննչական վարչության պետ Հովհաննես Վարդանյանը, որը 2020-ին զբաղեցրել է զինվորական քննչական գլխավոր վարչության ղեկավարի պաշտոնը, հրաժարվել է խոսելուց, ինչն էլ վրդովվեցրել է ծնողներին: ԱԺ նախագահ Ալեն Սիմոնյանը բղավել է ու ծնողներին ասել, որ եթե ֆորմատը ձեռք չի տալիս, կարող են դուրս գալ։ Ծնողներն էլ նրա վրա են բղավել: ՔՊ պատգամավոր Անդրանիկ Քոչարյանն է միջամտել, բղավել են նաև նրա վրա»,- գրել է թերթը։
Լրատվականի աղբյուրները հայտնել են, որ այդ լարված մթնոլորտում ծնողների մի մասը ֆիզիկապես վատ է զգացել, ԱԺ բուժկետի աշխատակիցները չափել են նրանց արյան ճնշումը, դեղեր տվել։ Թերթը նաև տեղեկացել է, որ ծնողների համար պատշաճ պայմաններ չեն ապահովել՝ շուրջ 200 տեղ ունեցող ԱԺ մեծ դահլիճում թույլ չեն տվել բոլոր ծնողները նստեն․ նանցից մի քանիսը նստել են դահլիճում, իսկ մի մասին բարձրացրել են վերև` ապակիներով մեկուսացված լրագրողների օթյակ:
«Հրապարակ» օրաթերթի տեղեկություններով՝ ծնողների պահանջներն ուղղված էին Քննչական կոմիտեի և ԱԺ պաշտպանության հանձնաժողովի ղեկավարներին։
«Ծնողները նրանց մեղադրել են իրենց պարտականություններում թերանալու մեջ: Նրանք նկատել են, որ իշխանության ներկայացուցիչները, մասնավորապես` ԱԺ նախագահը, փորձել են իրենց վրդովմունքն ուղղորդել Քոչարյանի և քննիչների կողմը»,- հավելել է թերթը։
2024-ի օգոստոսի 24-ին Կարմիր խաչի միջազգային կոմիտեն հայտարարել էր, որ 1990-ականներից սկսած՝ ներկայումս Հարավային Կովկասի տարածաշրջանում հակամարտության հետևանքով անհետ կորած է համարվում շուրջ 1000 հայ։
ՀՀ Քննչական կոմիտեն 2024 թվականի հուլիսի 2-ին Armenia Today-ի հարցմանն ի պատասխան՝ հայտնել էր, որ 1992-2023 թվականներին Արցախի և Հայաստանի դեմ Ադրբեջանի ձեռնարկած ռազմական գործողությունների հետևանքով անհետ կորածների թիվը կազմում է 1016։
