«Համահայկական ճակատ» շարժման մասնակիցները մարտի 5-ին կառավարության շենքի դիմաց խորհրդանշական սև արկղով բողոքի ակցիա են իրականացրել։
Ակցիայի շրջանակում «սև արկղը», ի տարբերության ավիացիայի, խորհրդանշում էր բաց նամակ՝ ուղղված Հայաստանի գործադիր մարմնին՝ պարզելու բյուջեին վերաբերող որոշ հարցեր։
Ակցիայի մասնակիցները դրա մեջ լցրել էին թղթի վրա գրված բազմաթիվ հարցեր այն մասին, թե ինչո՞ւ հենց ընտրություններից մի քանի ամիս առաջ կառավարությունը որոշեց 10 000 դրամով բարձրացնել 600 000 կենսաթոշակառուի ամսական կենսաթոշակը, ինչպես նաև իմանալ և հասարակությանը թափանցիկ կերպով ներկայացնել կառավարության տարբեր անդամների ստացած պարգևավճարների չափը։
«Համահայկական ճակատ» շարժման անդամ Ռուզաննա Ստեփանյանն արկղից մեկ-մեկ հանում էր հարցերը և ընթերցում դրանք։
Զուգահեռ՝ կառավարության նիստում ընդունվել է կենսաթոշակները բարձրացնելու մասին հարցը: Վարչապետ Նիկոլ Փաշինյանը հայտարարել է՝ թոշակները բարձրացնելուն նպաստել են նաև պետական համակարգի պարգևավճարները, պետծառայողները մոտիվացված են աշխատել և նախատեսվածից ավելի արդյունք ապահովել:
Ի դեպ՝ Ֆինանսների նախարարությունը մտավախություններ ուներ նախագծի, մասնավորապես 78 միլիարդ դրամ հավելյալ ծախսերի շուրջ: Ըստ գերատեսչության՝ այս քայլը ռիսկային է, քանի որ ֆինանսավորման աղբյուրները հստակ չեն: Ֆիննախը նախագծում նաև շեշտել էր, որ հաշվի առնելով առողջության համընդհանուր ապահովագրության համակարգից բխող ծախսերով պայմանավորված զգալի ֆիսկալ ճնշումները և բազմաթիվ այլ ուղղություններով հավելյալ ծախսերը՝ սա բավականին ռիսկային է:
Կառավարության նիստին, սակայն, փոխվարչապետ Տիգրան Խաչատրյանն ասել է, որ նախարարության հետ քննարկել են բոլոր այս հարցերն ու գտել են լուծումը: Ըստ Խաչատրյանի՝ առաջին քայլով հատկացումները կատարելու են եռամսյակային կտրվածքով, որ տարվա ընթացքում ֆինանսական կառավարելիությունը մշտապես լինի իրենց տեսադաշտում ու խելամիտ կարգավորումների ներքո: Որպես երկրորդ քայլ՝ փոխվարչապետը նշել է՝ վստահ են, որ ավելի բարձր տնտեսական աճը բազայի վրա նոր հարկային եկամուտներ է բերելու:
Մանրամասները՝ տեսանյութում
