Վրաստանի նախկին վարչապետ և իշխող «Վրացական երազանքի» նախկին առաջնորդ Իրակլի Ղարիբաշվիլիին մեղադրանք է առաջադրվել, հայտնում է apsny.ge-ն:
Նրան մեղադրանք է առաջադրվել Քրեական օրենսգրքի 194-րդ հոդվածի 3-րդ մասի «գ» ենթակետով, որը վերաբերում է հատկապես խոշոր եկամուտների հետ կապված փողերի լվացմանը։
Գործակալության տվյալներով՝ իր պաշտոնավարման ընթացքում Ղարիբաշվիլին «գաղտնի և ակտիվորեն զբաղվել է ձեռնարկատիրական գործունեության տարբեր տեսակներով՝ իր հայտարարագրերում կեղծ տեղեկություններ տրամադրելով, պնդելով, որ ընտանիքի անդամից նվերներ է ստացել խոշոր գումարներ»։
Մեղադրյալն ամբողջությամբ ընդունել է իր մեղքը։ Նրա բնակարանի խուզարկության ժամանակ առգրավվել է մոտ 6,5 միլիոն դոլար, թանկարժեք ժամացույցների հավաքածու և այլ զարդեր։
Գլխավոր դատախազ Գիորգի Գվարակիձեն հայտարարել է, որ պաշտոնավարման ընթացքում Ղարիբաշվիլին ստացել է առանձնապես խոշոր չափերի անօրինական եկամուտ։
Թբիլիսիի քաղաքապետ Կախա Կալաձեն «շատ տխուր և ցավալի է» որակել Ղարիբաշվիլիի դեմ մեղադրանքները՝ պնդելով, որ նոր է իմացել նախկին վարչապետի անօրինական գործունեության մասին։
«Իրակլիին վաղուց եմ ճանաչում, միասին ենք 2012 թվականից, նա մեր ընկերն էր: Սա կոտրում է իմ սիրտը: Սպասենք հետաքննությանը։ Դուք գիտեք, որ նա լքել է կուսակցությունը, հեռացել է քաղաքական գործունեությունից: Վերոնշյալ փաստը, որի մասին լսում ենք վերջին օրերին, տխուր և ցավալի է: Ոչինչ չեմ կարող ասել»,- ասել է Կալաձեն։
Ղարիբաշվիլին որոշել էր լքել կուսակցությունը և քաղաքականությունը։ Նա համապատասխան հայտարարությունն արել էր ապրիլի 25-ին։ Միաժամանակ, նա բացառել էր ընդդիմությանը միանալու հնարավորությունը։
2012-2013 թվականներին Ղարիբաշվիլին Վրաստանի հասարակական կարգի նախարարն էր, 2013-2015 թվականներին նա առաջին անգամ գլխավորել էր կառավարությունը, 2019-2021-ին զբաղեցրել էր երկրի Պաշտպանության նախարարի պաշտոնը, իսկ 2021-2024թթ.՝ երկրորդ անգամ Վրաստանի վարչապետի։
