Վրաստանի պատրիարքարանը Բաքվին կոչ է արել թույլատրել Ադրբեջանի տարածքում գտնվող եկեղեցում կրոնական ծառայություն մատուցել

Վրաստանի պատրիարքարանը կոչ է արել Բաքվին` թույլատրել իրեն կանոնավոր կրոնական ծառայություններ մատուցել Ադրբեջանի Գախի շրջանում գտնվող Կուրմուխի Սուրբ Գեորգի եկեղեցում, հայտնում են վրացական լրատվամիջոցները։

Այսպես է պատրիարքարանն արձագանքել ադրբեջանցու տեսահոլովակին, որում երևում է, թե ինչպես է նա եկեղեցու խորանին կանգնած «էլեկտրոնային երաժշտական ​​գործիքով» կատարում վրացական «Աճառուլի» երգը։ «Վերոնշյալ փաստն առաջինը չէ, և մենք մշտապես բախվում ենք լարվածության, հասարակության արդարացի վրդովմունքի և հավատացյալների զգացմունքները վիրավորող խնդրի առաջ»,- ասվում է պատրիարքարանի հայտարարության մեջ։

Ըստ ԶԼՄ-ների՝ հեղինակը YouTube-ից ջնջել է տեսանյութը դրա հրապարակումից մի քանի օր անց և վստահեցրել, որ տեսահոլովակը նկարահանել է «վրացական մշակույթի հանդեպ սիրուց և հարգանքից ելնելով»։

Վրաց ուղղափառ եկեղեցին նաև կոչ է արել Կովկասի մահմեդականների գրասենյակի ղեկավար Ալլահշուքյուր Փաշազադեին միջոցներ ձեռնարկել ապագայում նման դեպքերը կանխելու համար։ «Նման դեպքերը ևս մեկ անգամ հաստատում են, թե որքան կարևոր է ադրբեջանական տարածքում վրացական եկեղեցիների և վանքերի սկզբնական նպատակի վերականգնումը»,- հավելել է պատրիարքարանը։

Սուրբ Գեորգի եկեղեցին կառուցվել էր 12-13-րդ դարերում։ 2008 թվականի հոկտեմբերին Գախի շրջանի ադրբեջանական իշխանությունները որոշել էին արգելել ամենշաբաթյա ծառայությունները և փակել տաճարը։ Քահանա Գաբրիել Ջամբազաշվիլիին վռնդել էին տաճարից, իսկ դուռը՝ կողպել։

Ավելի ուշ Ադրբեջանի կրոնական կառույցների հետ աշխատանքի պետական ​​կոմիտեի մամուլի ծառայության ղեկավար Յագուդ Ալիևան հայտարարել էր, որ տաճարը ալբանական հուշարձան է և կապ չունի վրացական մշակույթի հետ։

Ադրբեջանի իշխանությունները «ալբանական» են անվանում նաև Հայաստանի Հանրապետության և Լեռնային Ղարաբաղի եկեղեցիներն ու պատմամշակութային հուշարձանները։

Մարտին ադրբեջանական լրատվամիջոցները ոչ միայն «ալբանական» էին անվանել օկուպացված Ստեփանակերտի Կրկժան թաղամասի Սուրբ Ամենափրկիչ հայկական եկեղեցին, այլև մեղադրել են հայերին «ալբանական հուշարձանները» ոչնչացնելու մեջ։ Ադրբեջանցի հնագետները հունվարին «հետախուզական պեղումներ» էին իրականացրել Արցախի Հադրութի շրջանի օկուպացված Տող գյուղի մելիքների կալվածքի բակում՝ գյուղի տարածքում գտնվող հուշարձանները ներկայացնելով որպես «ալբանական»։ Նախկին օմբուդսմեն Արման Թաթոյանը փետրվարին հայտնել էր, որ Բաքուն փորձում է յուրացնել Սաղմոսավանքը և Նորավանքը՝ Հայաստանի օկուպացման ծրագրերի շրջանակներում։ 

2023թ․ դեկտեմբերին Ադրբեջանը հայտարարել էր Հադրութի Սբ. Հարություն եկեղեցին որպես աղվանական թանգարան վերակառուցելու մասին։ 2023թ․ մայիսին Արցախի ՄԻՊ Գեղամ Ստեփանյանը դատապարտել էր Արցախի պատմության կեղծումը և նրա հայկական ժառանգության «ալբանականացումը»։