Նողկալի է անօրենների ոտնձգությունը Շիրակի թեմի Սուրբ Յոթ վերք առաջնորդանիստ եկեղեցու նկատմամբ, ՔԿՀ-ից հայտարարել են արքեպիսկոպոսներ Արշակ Խաչատրյանը, Միքայել Աջապահյանը և Բագրատ Գալստանյանը։
Նրանք դատապարտել են դեկտեմբերի 7-ին առաջնորդանիստ եկեղեցում պատարագ անցկացնելու վարչապետ Նիկոլ Փաշինյանի մտադրությունը։ Արքեպիսկոպոսները նշել են, որ այդ քայլով փորձում են պղծել ոչ միայն թեմի Մայր եկեղեցին, այլև մեծ երկրաշարժի զոհերի հիշատակը:
«Հարյուրապատիկ խորշելի և զազրելի է այն տիրադավ հոգևորականը, ով կտրվի հուդայի գայթակղությանը և ազատազրկված իր եղբոր կամ հոր կանոնական տարածքում՝ աշխարհիկ բիրտ ուժի միջոցով, պատարագանման արարողություն կկատարի և հոգևոր ինքնասպանություն կգործի Տիրոջ սուրբ սեղանի առջև: Կրկնում ենք՝ վախեցե՛ք Աստծո պատժից՝ Սուրբ Յոթվիրաց պատկերի միջոցով»,- ասվում է հայտարարության մեջ:
Նրանք շեշտել են, որ այդպիսի քայլի չեն դիմել անգամ թուրքական զորքերը 1918-ի և 1920-21-ի թուրքական օկուպացիայի ժամանակ, և ոչ էլ բոլշևիկները նույնիսկ 1937-38 թվականններին:
Արքեպիսկոպոսները նաև հորդորել են քահանայաց դասին ու ժողովրդին՝ անտեղի հակառակության ու վեճի մեջ չմտնել «ազգադավների ու տիրադավների հետ, այլ իրադարձությունների նման զարգացման դեպքում իրենց մաքրամաքուր աղոթքներն առ Աստված բարձրացնել թեմի մյուս եկեղեցիներում»:
Գալստանյանը կալանավորվել էր հունիսին՝ «ահաբեկչության» և «իշխանությունը զավթելու փորձի» մեղադրանքներով, իսկ Աջապահյանը՝ «իշխանությունը զավթելու հրապարակային կոչերի» համար՝ կրկին հունիսին։ Խաչատրյանը դեկտեմբերի 5-ին՝ կալանավորվել էր 2 ամսով։ Նրան մեղադրում են թմրանյութ իրացնելու մեջ։
Փաշինյանն ամիսներ է՝ պահանջում է Ամենայն Հայոց կաթողիկոս Գարեգին Երկրորդի հրաժարականը՝ հայտարարելով, որ նա զավակ ունի և խախտել է կուսակրոնության ուխտը։ Փաշինյանն այս փուլում մասնակցում է պատարագների, որոնց ժամանակ զեղչվում է կաթողիկոսի անունը։ Վերջինը տեղի էր ունեցել նոյեմբերի 30-ին՝ Սուրբ Սարգիս եկեղեցում, որից հետո թե՛ Փաշինյանը, թե՛ Նավասարդ արքեպիսկոպոս Կճոյանը չէին պատասխանել Armenia Today-ի հարցին, թե ինչո՞ւ է զեղչվել վեհափառի անունը։ Փաշինյանը հաստատել էր տեղեկությունը, որ իր մասնակցությամբ պատարագներից առաջ պետական ու այլ մակարդակով, այդ թվում՝ Ազգային անվտանգության միջոցով, քահանաներին խնդրում են չհնչեցնել կաթողիկոսի անունը։
Նոյեմբերի 30-ին եկեղեցու մի խումբ եպիսկոպոսներ և արքեպիսկոպոսներ կոչ էին արել կաթողիկոսին «հանգստյան կոչվել» և նոր ընտրություններ կազմակերպել։ Հայտարարությունն ստորագրել էր Հայ Առաքելական եկեղեցու 10 հոգևորական։ Նրանց մեծ մասն ավելի վաղ ստորագրել էր Մայր Աթոռի դիվանապետ Արշակ արքեպիսկոպոսի հրաժարականը պահանջող հայտարարություն, ինչպես նաև մասնակցել էր Փաշինյանի հետ հանդիպմանը։
Կարդացեք նաև՝
«Չուլանացված» եկեղեցիներից մինչև կաթողիկոսի փոփոխության կոչ․ ի՞նչ օրակարգ է փորձում պարտադրել Փաշինյանը
Ինչո՞ւ են Սամվել Կարապետյանին կալանավորել. եկեղեցի, քաղաքականություն, ներդրումային ռիսկեր
Ինձ վերագրվող տեսանյութերը կեղծիք են և սուտ․ Արշակ արքեպիսկոպոս
